Anda di sini

Rega lada udah niki: Larry

Advertisement

SIBU: Chairman Opis Lada Malaysia (MPB) Larry Sng Wei Shien mai berita berita gaga ngagai orang bekebun lada madahka rega lada chelum enggau burak udah niki.

Iya nengah Facebook kemari mantaika rega lada chelum niki RM1.20 ngagai rega RM9.40 sekilogram lalu lada burak bela niki RM0.50 ngagai RM15.70 sekilogram.

“Taja diatu kitai napi penanggul tang MPB naka alah nyaup orang bekebun lada lebih agi ba nengeri tu.

“Berindik ari nya mega, kami udah ngeluarka surat ngagai sida ke meli lada madahka MPB semina terus meli lada ari orang bekebun mit aja,” pia ku iya madah.

Larry ti mega Kaban Parlimen Julau madah, surat nya dikeluarka dikena nyaga orang bekebun lada ari ke lada sida sepeneka digagaka rega orang ke meli lada.

“Taja pia MPB deka bekerejasama enggau orang ke meli lada nyaup sida eksport lada ngagai menua bukai,” ku iya madah baru.

Ba Aum Parlimen sebedau tu, Larry kala minta Opis Menteri Industri Besai ngungkupka RM30 juta dikena nyebelaka rega lada ngambika enda jauh nurun.

Iya madah, RM30 juta nya tau diberi ngagai Opis Lada Malaysia (MPB) ngambika sida ulih meli lada ngena subsidi nya nyema rega nurun ari baruh RM12,000 setan.

Kenyau ari taun 2016 nyentuk bulan Julai taun tu, rega lada putih nurun urung 65 peratus lalu rega lada chelum nurun urung 63 peratus.

Pekara tu ngujungka orang betanam lada nadai chara bukai kelimpah nyual lada sida taja pan rega jauh murah ari suba.

Kelimpah betapi enggau rega ti murah, sida mega balat ngasaika tating belanja dikena ngintu lada baka bebelika sum enggau rachun.

Tu enda nyengkaum lada ti tau bendar dituntung penyakit.

Advertisement