MIRI: Raban berikan ditangkan anang nurun ke tasik enti raban Opis Pengemata Gaya Hari Malaysia (Met Malaysia) ngeluarka notis kategori keterubah, kedua enggau ketiga sepanjai musim Landas kandang diatu.
Pengari Met Malaysia Sarawak madah lebuh udah tama musim Landas diatu, gaya tasik endang begelumbang.
“Lebuh beratika gambar rajah satelit, ulih dipeda aktiviti ba Tasik China Selatan endang bisi ujan.
“Ba musim tu lebuh Met Malaysia ngeluarka notis kategori keterubah, kedua enggau ketiga, endang dilalau raban berikan anang nurun ke tasik, aku mega nemu sida mega nemu pasal pekara tu,” ku iya lebuh dirandau Utusan Borneo.
Ku iya, ukai semina raban berikan aja, tang mensia mayuh mega tau ngulihka penerang pemadu baru pasal gaya hari serata menua nengah bemacham rentayan ti disediaka Met Malaysia.
“Kelimapah ari website, Facebook, Twitter enggau Instagram, mensia mayuh mega tau narit aplikasyen ba telefon iya nya MyCuaca ti deka ngemuntangka pengawa meri penerang pasal gaya hari.
“Aplikasyen tu deka meri sida ‘notification’ enti sema bisi jaku tangkan baru dikeluar. Bisi lima bansa jaku tangkan dikeluar iya nya Tanah Berenyang tauka Tsunami, Kabut enggau Tasik Begelumbang, Kudi, Ujan Bangat enggau Siklon Tropika,” ku iya.
Aplikasyen interaktif tu mega ngasuh sida meda radar enggau satelit nitihka tinjau gaya hari serata menua.