MIRI: Staff PETRONAS Carigali Sarawak Oil (SK-Oil) enggau PETRONAS Floating LNG Satu (PFLNG1) udah nganjung bantu enggau pemeri baka berau, pemakai, gari, kereban mandi enggau mata duit ngagai urung 360 iku sida ti tasah angus ba Niah enggau Bekenu ditu, apin lama ke udah.
Nitih ku penerang berita kemari, barang bantu udah disua ngagai sida ti tasah raban pengari ari PETRONAS subsidiaries, diketuaika Ketuai Pengatur Pengawa SK-Oil, Suif Alias.
“Pengawa tu seriris enggau siti ari tiang tanggungpengawa rama korporat (CSR) kami ti mantu ngintu pengelantang mensia mayuh. Kami ngarapka pemeri tu deka ngelempungka tating penusah sida ti tasah,” ku Suif.
Bala penerima bantu datai ari 38 ruang bilik Rumah Panjang Usek, Niah enggau sebuah isi bilik ba Kampung Satap, Bekenu ti nadai rumah agi pengudah angus dalam bulan November enggau 2 Disember tu tadi.