Anda di sini

Malaysia, Indonesia patut bekerejasama ngentapka rega sawit

Advertisement
David Wong - Gambar Twitter 

SIBU: Malaysia enggau Indonesia patut bekerejasama enggau pangan diri nentuka pengentap rega sawit dua buah menua tu.

Mandal Chairman Parti Tindakan Demokratik (DAP) Sarawak David Wong madah, kerejasama tu beguna dikena ningkah kimpin ke diatur menua Eropah ti bejai produk sawit.

"Kitai nadai meda kerejasama antara dua buah menua tu tang semina meda ulah ngelaban pangan diri beumba-umba bepekit sapa pemadu mayuh eksport produk sawit.

"Nya alai, udah maya iya alai Malaysia berandau enggau Indonesia ngatur chara ke engkeman dikena nentuka rega produk sawit ba makit dunya ba tikas ti manah," pia ku iya maya aum media ditu sehari tu.

Wong ti mega Kaban Kunsil Nengeri (ADUN) Pelawan madah, kimpin ke digaga menua Eropah kebendar iya dikena sida nyaga pengelikun orang bekebun ba menua sida.

"Malaysia enggau Indonesia ngeluarka pemadu mayuh sawit iya nya 85 persin ba makit dunya.

"Randau ke lengkas patut diatur kededua buah menua tu," ku iya.
 
Kelimpah ari nya, iya mega ngarapka perintah nengeri bela besaup enggau perintah besai ngatur kerejasama baka tu.

"Diatu ukai maya iya besalah pangan diri tang besaup mutarka penusah rayat Sarawak.

"Nambahka nya, udah maya iya Gabungan Parti Sarawak (GPS) mandangka diri nulung rayat laban ngelama tu sida semampai kering madahka diri beratka pengelantang pengidup rayat," ku iya madah baru.

David madah, perintah patut berunding nama bantu ke patut diberi ngagai orang betanam sawit kebun mit ba nengeri tu.

"Tebal agi sida ti betanam sawit kebun mit tu iya nya bansa Dayak. Kebun sida semina 10 ngagai 20 ekar aja pemesai.

"Ngarapka perintah beratika penanggul rega sawit ke mit ti benung ditapi sida diatu," pia ku iya.

Advertisement