MARUDI: Sukung ari mensia mayuh ngagai ejensi perintah beguna amat ba pengawa mutarka penanggul rama baka isu salah guna dadah.
Tang kaul nyata sida deka nyaup ejensi tauka raban bekuasa mutarka penanggul rama enggau meruan agi.
Berindik ari nya, Menteri Muda Kaunsil Kandang Menua, Datu Dr Penguang Manggil, dekaka bala komuniti seruran nemu lalu patut berengkah bejalaika pangku pengawa enggau tanggungpengawa sida empu besaup enggau ejensi perintah sereta bela bejalaika agenda perintah, nadai kelalu bepanggai ba ejensi perintah aja.
Penguang ti mega ADUN Marudi mansutka jaku nya lebuh bejadika Pengerami Makai Lemai Ngenang Jasa Kaunsil Pelilih Subis (MDS) ba sebuah hotel di Miri, Hari Enam tu tadi.
Pengerami nya diatur Kelab Rekreasyen enggau Ngintu Pengelantang MDS nyadi siti ari aktiviti ngenang jasa enggau kerejasama ti udah diberi komuniti menua nya ngagai raban kaunsil.
Kenu ku Penguang, pengawa enggau kerejasama ti dipadah MDS nya mega baka kaul bala komuniti ngatur program ti ngaul pemerat sida.
“Kerejasama baka tu beguna amat dikena nentuka pemujur enggau pemanah pangka program ti diatur.
“Kelimpah ari kaul ba pengawa ngatur program kaunsil, sida mega ulih mantu raban kaunsil ngintu taman mensia mayuh, aktiviti meresi, ngintu uras, nyaga pengelikun genturung pendiau, nagang aktiviti salah, ngelanggar undang-undang kaunsil, tama nadai pemendar enggau ke bukai,” ku iya.
Pia mega ku iya, gaya dunya kemaya hari ti udah berubah, ke alai peminta enggau peneka rayat mega berubah.
“Nya alai PBT patut seruran gawa bebendar agi nentuka servis diberi sida nangkup peminta enggau peneka kemaya hari.
“Ubah ngenataika servis mega patut seruran dipejalai nentuka projek enggau program ti dilangkar enggau dipejalai mujur enggau lanchar,” ku iya nambah.
Nuju bala staf enggau raban kaunsil ku Penguang, iya ngingatka sida pekara pemadu beguna iya nya pekara ti dikedeka enggau dikenggai rayat, ukai pekara ti dikedeka raban kaunsil.
“Nya kebuah kitai patut ngaul rayat laban tu deka mantu kitai nentuka tetiap projek dipejalai raban kaunsil deka mujur enggau lanchar laban nerima kerejasama bala komuniti,” ku iya.
Ba lansa bukai, Penguang madah taun nyin tadi, lima buah PBT Sarawak udah nerima kelala lima Bintang; semilan agi PBT nerima empat Bintang enggau 12 PBT bulih tiga Bintang.
“Bisi nambah manah dibida taun sebedau nya lalu aku ngarapka MDS ulih nyapai abis nadai empat Bintang dudi hari,” ku Penguang.
Sama datai Chairman Komiti Mendam Komuniti enggau Dagang Temuai MDS, Kaunsilor Annuar Ahmad; Pemangku Sekretari MDS, Farrah Sofya Mohd Sharbini sereta bala staf enggau kaban MDS.