KUCHING: Sapit Kepala Menteri, Tan Sri Datuk Amar Dr James Jemut Masing madahka tetiap organisasyen meseti ngemeratka sukut tusun pengawa ti meruan.
Ku iya, ngatur pengawa ti meruan ulih nentuka sebuah gempung tauka serikat mujur enggau terus beretan.
“Tusun pengawa ti meruan nyadi resia pemujur sebuah gempung enggau serikat, pekara tu nyata diayanka Konsortium Bumi Consultants & Service (KBCS) Sdn Bhd,” ku iya.
Iya mansutka jaku nya lebuh bejaku ba Pengerami Makai Selamat enggau Krismas diatur serikat nya ditu, apin lama ke udah.
Masing ti mega Menteri Pemansang Infrastruktur enggau Pengangkut madah pemujur KBCS asil ari komitmen enggau atur pengawa meruan ti dikemeran kenyau ari pengawa numbuhka iya 12 taun ke udah.
“Tabi puji ngagai Dato Ir. Janang Bungsu, ti nyadi Menijar Besai KBCS enggau Kunsil Direktor serikat ba penyapai ti ngemegah.
“Tu asil komitmen, atur pengawa meruan enggau semengat bekerejasama ti dikemeran ditu ngelama tu,” ku iya.
Ba lansa bukai, Janang ba jaku ngelalu iya madahka Bajet Nengeri 2019 ti dibantaika Kepala Menteri Datuk Patinggi Abang Johari Tun Openg pun bulan November tu tadi meri awak ngagai serikat menua tu ngaul diri ba pemansang Sarawak.
Madahka Bajet 2019, bajet pemadu besai Sarawak naka diatu, Janang ngarapka Serikat Gerup KB ulih bejalaika pangku pengawa besai ba industri berumah ba nengeri tu.
“Kebuah pia, nyauka 80 peratus ari RM11 bilion penyampau kesemua Bajet 2019 ungkup pemansang nengeri,” ku iya.
Ngelansa pasal pengerami nya, Janang madahka iya diatur dikena ngerami semua staf Serikat Gerup KB ti udah bebendar gawaka pemujur serikat nya.
“Ngena awak tu, aku meri terima kasih enggau meri kelala bakih ngepunka serikat tu iya nya Ar. David Hollis enggau Ir. David Sengalang laban nadai kala leju sereta bekerejasama rat ti diberi ngelama tu.
“Sida tu ukai semina patut nerima kelala aja tang lebih ari nya, pia mega semua raban KBCS,” ku iya.
Berebak enggau nya 12 pekerwja KBCS ti gawa pemadu lama nerima loket emas berega RM1,000 siku enggau insentif ngagai bala anak staf ti nyulut ba peresa sida.
KBCS bela nyuaka pemeri ngagai beberapa serakup antara iya Gempuru Besai (RM5,000), IRM Evangelical Berhad (RM5,000) enggau kaul bakih pekereja kilang ba Batu 4 ditu nengah IRM Outreach (RM1,000) kelimpah pemeri kantung sekula enggau kereban tulis ngagai bala anak sida.
Sama datai Sapit Speaker Aum Kunsil Nengeri, Dato Gerawat Gala, Menteri Muda Nembiak enggau Lumba Datuk Snowdan Lawan, Kaban Kunsil Nengeri (ADUN) Layar, Gerald Rentap Jabu, ADUN Pelagus Wilson Nyambung enggau Sapit Presiden Parti Rakyat Sarawak (PRS) Datuk Salang Gandum.