KUCHING: Sekretari Besai Parti Rakyat Bersatu (UPP) George Lo enggai meri komen sentang spekulasyen diak dua iku ex-Kaban Parlimen (MP) deka nyereta parti nya.
Kededua ketuai politik ke disebut iya nya ex-MP Selangau Datuk Joseph Entulu enggau ex-MP Lubok Antu Datuk William Nyalau.
“Aku enggai komen sentang pekara tu, manah agi kita nanya Datuk Joseph Entulu empu. Sigi amat pintu parti seruran dibuka ngagai orang ti ngembuan visyen ke sama enggau UPP.
“Enti iya (Entulu) ngembuan visyen ke sama, kitai ngelaluka penatai iya nyadi kaban dalam parti.
“Diatu, nadai pinta nyereta UPP diterima ari Entulu,”ku George nyaut tanya pemberita pengudah nyuaka pom pinta nukar nama enggau logo UPP ngagai ke baru di Opis Pengerijista Gerempung (ROS) di Jalai Wan Alwi ditu, kemari.
Ba sentang Nyalau, George mega madah nadai nerima pinta nyereta UPP naka ke diatu.
Tajapia iya madah enti Nyalau ngenataika pinta nyereta UPP, parti deka merundingka pinta nya enggau berat.
“Kitai nemu iya( Nyalau) kaling rat Dr Johnical Rayong (ketuai Bagi Nembiak UPP) alai enti bisi pinta ari Nyalau, UPP deka meratka pinta nya.
“Udah tentu enti Nyalau (pia mega Entulu) nyereta parti, seduai deka nyadi aset UPP,” ku George.
Ngenang kaul bukai, George madah UPP ti deka ditukar nama ngagai Parti Sarawak Bersatu (PSB) keran deka nambah penyampau kaban parti.
Ku iya, rayat ti ngembuan visyen ke sama enggau parti dikelalu nyereta UPP ngambika parti majak tegap.