KAPIT: Kaban Parlimen (MP) Hulu Rajang Wilson Ugak Kumbong asa enggau Bajet 2019 ti ngurangka Subsidi Padi Bukit laban nyata mangka peranak menua pesisir ti ngereja pengawa bumai padi bukit.
“Kitai benung ba Aum Parlimen pasal bajet 2019. Tebal agi kitai ari Sarawak enda lantang ati enggau Bajet 2019 ti ngurangka Subsidi Sum Padi Bukit enggau mayuh pekara bukai ti ngasuh kitai ari sitak menua pesisir nadai teulihka penguntung.
“Mayuh peranak menua pesisir datai ari raban bumai lalu tu endang mangka pengidup sida. Anang nyebut ka nulung peranak menua pesisir, ngasuh ngenusah agi,” ku Ugak.
Ku iya, sebedau Pengawa Bepilih Besai Ke-14 (PRU14), Pakatan Harapan (PH) nabur mayuh semaya tang pengudah nyadi perintah, sida enda ngamatka semaya diri. Ba Kuala Lumpur, sida bisi nyendiaka subsidi pengangkut dikena ba kereta api penyampau RM100 sereta mega subsidi minyak ngagai entukar di baruh 1500 CC.
“Sinu amat baka kitai ba Kapit, anang deka bisi jalai alun ti meruan, mayuh peranak bepanggai ba perengka pengangkut sungai, ngena perau panjai enggau injin sepit. Nama penyadi nadai subsidi minyak diungkupka sida ti bekenaka perau. Kitai nadai pilih bukai tang ngena entukar 4WD nengah jalai darat. Tang perintah enda ibuhka peminta kitai,” ku iya.
“Perintah sebedau tu, sida berandau enggau kitai pasal bajet. Perintah ke bisi diatu, sida nadai kala berandau enggau kitai. Bajet 2019 ngagihka RM271 biliun ngagai Semenanjung, RM5 biliun ngagai Sabah enggau Sarawak RM4 biliun.
“Pemesai tanah Sarawak sebaka enggau Semenanjung lalu dua kali lipat Sabah, kitai diagih belanja pemadu mimit. Mayuh projek deka kena pangka. Sitak Hulu Rajang mungkur 31,000 square kilometers ti nyengkaum Baleh, Belaga, Murum enggau Tubau.
“Bisi 560 buah rumah panjai ba Hulu Rajang lalu bisi urung 6.9 juta projek kena pangka. Tu ngasuh aku chukup enda lantang ati,” ku Ugak madah kemari lebuh bejadika pengawa nyuaka belanja Projek Mit Pemansang Menua Pesisir (MRP) ngagai bala Komiti Pemansang enggau Pengelikun Pendiau (JKKK), Serakup Apai Indai enggau Pengajar (PIBG), raban Kelab Pengintu Pengelantang Rama enggau Rekreasyen di Baleh ti nyadi siti ari sitak bepilih kunsil nengeri di baruh P 216 Hulu Rajang.
Pengawa udah diatur ba bilik aum Opis Pelilih Bukit Mabong di Komplek Nengeri Bletih ditu.
Pemesai Pelilih Bukit Mabong, Tracy Nyipa, Menijar Palan Sivik Kapit, Bakat Gira, Staf BOMBA, Siangang Usat, Penghulu Sallang Batang, Penghulu Bunsu Geringgang, Penghulu Jampi Raweng enggau bala bukai bisi ngulu pengawa sehari kemari.
Sepenyampau RM394,000 udah disua ngagai 41 raban penerima ari Baleh iya nya JKKK Rumah Kiroh, Rumah Goyang Apat, Rumah Lion Lading, Rumah Jack Bidai, Rumah Linggan Ajan, Rumah Langga Munanm Rumah Tajai Sanggau, rumah Jamit unggat, rumah Samon, Rumah Jack Sibat, Rumah Soselly Sinatu, Rumah Banggau Undi, Rumah Bully Janggau, Rumah Tinggong Muyok, Rumah Gindal Baji, Biro Indu Rumah Weng, Rumah Minggu, Emperan Jawong, Rumah Lawan, Rumah Belikau Gerinang, Rumah Mengga Ukau, Rumah Ragal Ubong, Rumah Nading Jalin, Rumah Baweng Enyang, Rumah Laso Bunya, Rumah James Bandak, Rumah Sebuang Mambang, Rumah Nawaii, Rumah Sejong Nawai, Rumah Bansa Langga, Rumah Itu Tanjung, Rumah Langut Dampa, Rumah Bigau Ujan, Rumah Kasau Belayang, Rumah Tungku Bali, Komiti Gerakan Bala Ketuai Merit Ulu, JKKK Tatai Penglima Sungai Kapit, Rumah John, Rumah Bidok Bajok, Rumah Steward Sambang, Rumah Panggau Jugah, Rumah Gon Ngkang, Rumah Ajut Jugah, Rumah Sumbang Singkut, Rumah Bajai Chendran, Rumah Jampang Merang, Rumah Nyawai Dangih, Rumah Layang Entilie, Rumah Agang Gajah, Rumah Jaweng Jantal, Rumah Jimbun AJai, Rumah Unggang Anda, Rumah Lamau Jenggut, Rumah Maweng Embol, Rumah Jimbun Sandin, Rumah Nyanggau Sandin, Rumah Pinin Tujong enggau Rumah Tinggan.