SIBU: Gerempung Besai Serakup Pedagang Kupi enggau Restauran (PPKR) Sarawak minta perintah Pakatan Harapan (PH) matak pulai atur ti nagang orang nginsap ba kedai kupi ke deka belabuh dipejalaika berengkah 1 Januari 2019.
Presiden gerempung tu, Hii Hung Yii madah, sida nangi bendar nyema atur tu dipejalaika ila deka mai pangka ke enda manah ngagai dagang sida.
“Baka jaku Menteri Besai Tun Dr Mahathir Mohamad ti madahka nadai ngawa matak semaya laban enda semua orang silik manah magang pia mega kami minta iya matak baru perambu atur nya,” pia ku iya madah maya aum media ditu, kemari.
Hii madah, rayat milih PH nyadi perintah maya Pengawa Bepilih Besai Ke-14 suba ketegal ti andal deka ngasaika menua tu lantang agi diuan ari ke udah-udah.
“Tang pengingin rayat diatu nyau tekalih sereta balat ngenusahka rayat nyengkaum atur ti deka digaga tu.
“Kediatu mega kami udah napi bemacham penanggul bepun ari mayuh atur baru digaga PH,” ku iya madah baru.
Berindik ari pekara nya, iya minta menteri ti ngepunka perambu nya tau datai duduk ba mija kedai kupi ngambika ulih meda baka ni gaya dagang orang bekedai kupi maya hari tu.
“Anang semina senang duduk ba opis, semina landik ngaga atur baru aja.
“Datai ngelawa kami lalu peda penusah kami bejalaika dagang maya diatu,” ku iya sambil madah pemendar sida ngulihka penguntung berengkah ari 4 pagi nyentuk 3 lemai ninting hari.
Nambahka jaku iya, ku Hii, atur baru nya netapka sida ti beempu kedai kupi deka diukum mata duit nyema sida enda nagang orang nginsap dalam kedai sida.
Ku iya, atur nya enda engkeman sereta balat ngenusahka sida.
“Kami ukai enda besetujuka perintah nagang orang nginsap tauka ngasuh orang nginsap tang kami ngarapka perintah nemu nama diasaika orang bedagang kedai kupi,” pia ku iya.
Nangkan aum media nya, Hii nguluka raban gerempung sida bebala mayuh begempuru likun dikena mantaika gerempung sida ningkah atur baru nya.
Pengawa sida tu diatur ba Pintu Gerbang Sibu ditu.