KUCHING: Dunya dagang nyangka peneleba ti baru ngagai kitai raban bansa Dayak kelebih agi ngaul dagang ekonomi digital ti ditibak ari penemu Kepala Menteri Sarawak Datuk Amar Abang Johari Tun Openg empu.
Beambi ulih ari awak enggau pengulih ti bisi ba dunya dagang kemaya hari ke alai Mageline Pidang Anye enggau laki iya, Martin Saba Changgai, ransing ati numbuhka Michelle Grace Touch Bridal & Studio tauka MGT Studio dalam taun 2012.
Lebuhka dirandau pengarang berita, Mageline Pidang, 36 taun, siku indu bansa Kenyah ari Uma Sambop Belaga madahka iya ti kala menggi gelar Keligit Orang Ulu Renggat Bagi Menua Bintulu (2003) enggau Renggat Nengeri Sarawak (2004) nerima peransang ari laki iya empu, Martin ti mungkal enggau ngempu MGT Studio.
“Iya (Martin) suah meri peransang ngagai aku ba pengawa ngemaju enggau nguna pengelandik jari ngantaka orang. Aku sigi rindu amat pengawa nganta kenyau ari sekula sekondari.
“Bepun ari rinduka pengawa tu ngasuh aku angkun agi ngansah penau enggau pengelandik diri nguasa pengawa tu lalu mujur mansutka belanja tambah ngagai kami sebilik.
“Tu disukung laki aku, Martin, ti landik ngelagu buk, bemacham gaya, ngujungka kami duai sepenemu nyendiaka servis nganta enggau ngaga buk nengah studio lalu asil jari seduai endang chulin ditengkebang ari penemu diri empu,” ku Mageline ngelansa.
Diatu ku iya, jeman udah ngalih ngagai ekonomi digital, semua dagang bepelasarka servis online tauka dagang online nyengkaum chara berunding minta enggau nerima servis, bebayar mega nengah transaksyen online.
“Nya kebuah kami duai mega berani nguji nyingkang begulai enggau bala bukai bedagang tauka ngelakuka servis nengah online baka Page Michelle Grace Touch Bridal & Studio – MGT Studio enggau Facebook Mageline MGT Studio/Martin Saba Chan lalu sida ti deka begunaka servis enggau penerang silik pasal studio tau betanya nuju aku empu ba lumur 013-8401363) enggau Martin (019-7344931).
“Antara servis bisi disediaka studio kami duai baka Andaman Pengantin, Solekan Pengantin, Stage Make-up (kena bepekit), Pelamin Dewan & Pelamin Rumah, Hall Décor, Church Décor, Hotel Décor, Photobooth enggau Car Décor.
“Studio kami mega bisi nyendiaka suwa ngepan Iban kena melah pinang enggau bepekit sereta suwa gaun enggau kut serata kereban ngias ke bukai (aksesories) kelimpah bejualka minyak wangi enggau produk kecantikan ari FFC Colour Cosmetic,” ku Mageline nerang.
Ku Mageline, orang ti nyadi inspirasyen iya ngaul diri ba bidang tu iya nya Dewi Tian, siku juru solek ari Indonesia sereta bakih iya empu, Ramenda Kiyek di Miri. Studio seduai mega kala melanja makeup enggau baju dikena emcee Anugerah Carta Sapa Juara (ACSJ) 2016, DJ Lucia Thomas Kasau enggau ACSJ 2017, DJ Stefahie Jeffery.
“Tu kenang manis kami duai udah bekerejasama enggau raban RTM Bagi Iban ngemujurka pekit ti ngangkatka artis kitai Iban ba nengeri tu. Tu mega kelai sukung ba industri pemerindang kitai ditu,” ku iya nambah.
Naka diatu ku iya, seduai nadai kala nerima bantu ari sebarang ejensi perintah tauka peribit lalu semua pemujur dagang seduai bepanggai ba asil pengepuh enggau pengeran diri empu ngemansang enggau ngangkatka nama diri ba dunya dagang sebaka enggau orang bukai.
“Baka orang bukai mega, kami duai chakah ngambi kus bekaul enggau bidang diri empu, nganta enggau ngaga buk ba menua tu enggau Semenanjung, lalu diatu aku benung belajar tikas diploma ba sebuah akademi di Kuching.
“Aku pechaya kitai deka teulihka asil belipat enti ngena teknologi ke pemadu baru ba dagang online kelebih agi diatu nyauka semua pengawa kitai dikereja nengah online, sebagi ari pengawa dipejalaika perintah ngemuntangka atur pengawa enggau ngelimat jam gawa,” ku iya.
Ku Mageline, enti kitai puh ngereja pengawa ti dijuluk kitai endang deka mansutka asil baka ti dikingin. Nya kebuah iya suah meransang diri anang leju belajarka penemu enggau pengelandik baru laban ari nya kitai ulih mekit pedagang bukai, ti sama bidang tauka dagang enggau kitai, ngambika nyulut sereta manah agi servis.
“Penemu Teknologi Pemadah enggau Arus Penyambung (ICT) endang nyadi duku penebas dikena ngerandang jalai dagang dikaul kitai. Enti suba, kitai bumai bekenaka kereban gawa ngambika umai nyadi lalu asil padi manah. Baka nya mega kitai ti bedagang, mesti pintar runding bekenaka kereban ti patut enggau awak ti bisi disedia.
“Besai juluk ati aku ngarapka dagang ti dipunka kami duai melaki bini majak mansang sereta maju nitihka singkang enggau ubah pemansang dunya kemaya hari kelebih agi ngaul dagang ekonomi digital.
“Endang utai dipinta ulih ngerembaika dagang tu ukai semina di bagi menua Sibu aja, tang mega nempa nama renggat antarabansa kelimpah ngetanka ngepan asal kitai Dayak ba dunya dagang,” ku Mageline nyimpul randau.