BETONG: Enda entu engkeman enti semina ngembuan siti aja kanun tanah menua ungkup guna ba selampur Malaysia.
Sapit Kepala Menteri Datuk Amar Douglas Uggah madahka langgur penemu ti dibantai ngagai iya ari siku kaban kabinet Perintah Besai ba sebengkah randau ba Putrajaya apin lama ke udah.
Ku iya, langgur penemu tu ukai semina enda patut tang enda berundingka pengelain enggau pemayuh kelikuh isu tanah ba nengeri tu.
Menteri Betanam Betupi Moden, Tanah Adat enggau Pemansang Kandang Menua nya madahka iya madah ngagai menteri nya ke alai Sarawak ngembuan Kanun Tanah diri empu belalauka Konstitusyen Nengeri.
“Kitai bisi penyelai enggau mayuh pemar diputar ba tanah Adat Bansa Asal (NCR), kelimpah bisi isu bekaul enggau Pemakai Menua enggau Pulau Galau (PMPG).
“Nya kebuah kanun tanah menua ti siti aja enda engkeman lalu enda nyadi isu,” ku iya lebuh bejaku ba Program Pemesai Begulai Enggau Rayat ba Rh Entiggan di Munggu Gernis, Spaoh, ditu, kemari.
Ku Uggah, pekara tu nyadi siti chunto nama kebuah nengeri tu patut diperintah bala ketuai sida empu.
“Kitai mega bisi perambu enggau program diri empu dikena mutarka iya lalu nyaga hak nengeri tu ba pemansut enggau pengaya iya empu,” ku iya nerang.
Ngelansa pasal isu tanah, Uggah ngingatka rayat anang jampat pechayaka penerang ti suah dibantai ba media rama ke alai perintah nengeri GPS deka terus ngerampas tanah peranak asal enggau nadai pampas ti patut enti sida patut ngaga baka nya ba tuju projek pemansang besai.
Iya nulak pekara nya nyadi jaku selebubu ngapa bala penyakal dikena ngelemika pengandal rayat ngagai perintah.
“Anang pechayaka semua penerang ti dibacha dedin. Tukuka dulu. Bisi sekeda orang tetiap hari rindu amat bejai perintah enggau bala ketuai iya.
“Sida mesti ngiga penyalah enggau isu tauka nempa iya enti sida enda ulih tetemuka nya, semina ngemantupka ati sida,” ku iya madah nyemetak.
Ngelansa pasal sukat kelingi ti benung dipejalai ba tanah NCR, ku Uggah, perintah nengeri udah ngagihka RM40 juta ungkup tuju nya ba taun baru dikena mantu pengempu tanah.
Ba lansa bukai, iya mega ngingatka raban nangkal getah ke alai sida bisi hak nerima sekeda bantu belanja berindik ari rega komoditi nurun diatu.
“Aku sinu laban agi tubah enda nemu pasal pekara tu, minta kad IPG dikena ngelala kita orang ti ngempu tauka nangkal getah ti dikeluarka Komiti Getah Malaysia (LGM),” ku iya.
Berebak enggau nya, iya ngelalau sida nyimpan semua resit getah ti dijual ngambika sida ulih minta bantu.
Ku iya, di baruh Skim Insentif Pengeluaran Getah, sida ulih minta ba tetiap seringgit sekilo getah udah dijual sida.
Ku Uggah, sida patut meresa enggau Opis Betanam Betupi besemak tauka opis LGM ungkup penerang silik.
Iya disempulang Sekretari Politik Kepala Menteri, Dr Richard Rapu, udah nya bejalai ngabas dua buah rumah panjai ba dia.