Dikarang Judan Bungap
SIBU: Semua 52 iti palan ngenduh sementara ketegal penusah ampuh bah di sitak Sibu udah besedia dibuka dikena napi penusah nya.
Chairman Komiti Mutar Penusah Ngenyit Sitak (JPBB) Sibu Charles Siaw madah, palan tu bela udah ditentuka disikap enggau perengka guna ti chukup.
"Taja kediatu empai dibuka tang komiti kitai udah besedia muka palan tu sebarang maya.
"Di pelilih Sibu kitai bisi 25 iti palan, pelilih Selangau (10) enggau di Kanowit (17)," pia ku iya maya ditanya pengarang berita, malam ensana.
Charles mega madah, naka kilah ensana, sekeda endur ke baruh di Sibu bisi ampuh ai enggau penalam urung sekaki.
Ku iya, pekara tu nyadi diumbaka enggau musin ai pasang raya.
"Ketegal nya, kitai ngarapka mensia mayuh lebih agi sida ke diau ba endur ke baruh semampai bejejaga laban diatu musin ujan kelimpah pasang raya," ku iya madah baru.
JPBB Sibu disaup beberapa iti ejensi iya nya Penyaga Pengelikun Mensia Mayuh Malaysia (APAM) begulai enggau raban soldadu, Opis Kaunsil Sibu (SMC), Opis Kaunsil Menua Pesisir Sibu (SRDC) enggau komiti ari sekula (matau penusah ampuh di sekula) bejalaika pengawa matau penusah ampuh bah.