Anda di sini

Ujan bangat udah ngenusurka bukit ba belakang Rumah Nanga Lajan

KAPIT: Pengudah beberapa hari ujan bangat, ai ujan nya udah ngelembutka tanah tebing bukit ba belakang Rumah Nanga Lajan ba Jalai Song – Kapit, Pelilih Song ditu.

Opis BOMBA enggau Penyelamat Song pagi kemari, urung pukul 8 pagi udah nerima ripot ti  madahka tanah tusur nyadi ba belakang Rumah Nanga Lajan ti ngujungka tanah ke tusur nya neruju dapur sida, lalu pun pinang mega rebah sereta ninggang lalu ngerusak atap rumah sida.

Seraban enam iku BOMBA ti betuaika Nasihin Anak Jaum, udah ngagai rumah panjai nya mansik pun penusah sereta mantu peranak rumah panjai nya ngerat pun pinang enggau utai ke bukai ti rebah ninggang atap rumah.

Taja pia, nadai orang diripot bebadi ba penusah ke nyadi nya.

Orang ke diau ba kandang tebing bukit tauka tanah ke baruh,dilalau bejejaga maya musim tengkujuh tu. Bagi Menua Kapit ngembuan tanah ke tinggi ti mudah tekerap, tusur sereta mega endur ke baruh suah kena ampuh bah nyenyit.