Anda di sini

Projek ngaga jalai alun Sibu ke Kapit tembu taun 2020

 Masing (duduk, tengah), Liwan (duduk, kanan) enggau bala bukai begambar pengudah mendingka  peneang ari JKR.
GAMBAR BEGULAI: Masing (duduk, tengah), Liwan (duduk, kanan) enggau bala bukai begambar pengudah mendingka peneang ari JKR.

KUCHING: Kapit deka disambung enggau jalai alun ke dibelakin di serata Sarawak pengudah jalai ari Kapit ke Sibu tembu digaga, manggai ba taun 2020.

Sapit Kepala Menteri Tan Sri Datuk Amar Dr James Jemut Masing madah, sambung jalai ke lama endar udah dianti tu, nganti penembu 9.2 km ‘missing link’ entara Ngungun, Ngemah ngagai Song ti dipelabaka tembu kena bulan Ogos 2020.

“Enti nya tembu, jalai belakin ari Kapit - Song – Sibu mega deka tembu digaga,” ku iya pengudah mendingka penerang ari Opis Kereja Raya (JKR) Sarawak kemari.

Nitihka penerang ari menijar JKR Kandang Tengah Menua Sarawak, Cassidy Morris madahka pemujur kereja ngaga sereta nembuka ‘missing link’ Projek Jalai Song – Kapit Seksyen B (Pakej 1) Jalai Ng. Ngemah/Ng. Temalat diatu manggai 11 peratus.  

Ku Masing, terima kasih patut diberi ngagai Menteri Besai ke sebedau tu,Datuk Seri Najib Tun Razak laban udah ngamatka pengawa ngaga jalai alun ti nyambung ngagai Kapit nya nyadi nyata.

“Terima kasih Najib, enti nadai nuan menua Kapit lalu enda disambung ngagai serata nengeri Sarawak,” ku Masing, ke mega Menteri Pemansang Infrastruktur enggau Perengka Pengangkut.

Sama bisi datai  mendingka penerang nya Menteri Muda Bekal Ai ti mega Kaban Kunsil Nengeri Belaga Datuk Liwan Lagang, Kaban Kunsil Nengeri Ngemah Alexander Vincent, Kaban Kunsil Nengeri Machan Allan Siden Gramong, Kaban Kunsil Nengeri Pelagus Wilson Nyabong Ijang, Kaban Kunsil Nengeri Bukit Goram Jefferson Jamit Unyat enggau Kaban Kunsil Nengeri Murum Kennedy Chukpai Ugon enggau Pemesai Residen Kapit Joseph Belayong.

Masing mega madahka di Belaga, Jalai Menjawah ke panjai 34 km ti ti udah digaga nyadi jalai standard R1, dipelaba tembu digaga kena bulan 23 Mei 2020, ke alai pengawa ngaga jalai nya diatu mujur ari baruh kemata  JKR Sarawak.  

“Semina sebagi mit jalai ( Jalai ari Belaga – Menjawah) mansa palan pengentap baru. Sarawak Energy Berhad mega deka nirika tiang elektrik ba semanjai jalai nya dikena nyambung  karan ngagai rumah p anjai ari Pasar  Belaga tauka stesyen mit di Bakun,” ku iya.

Masing enggau bala bukai mega diberi JKR penerang sentang pemansang jalai enggau pengawa ngaga jematan,pangkalan enggau palan penyangkai kapal ba kandang Zon Tengah.

Tu nyengkaum Projek Jalai Baleh ti dibagi ngagai  Pakage A, Pakej B enggau Pakej C ke pemanjai 36.258 km, 14.440 km enggau 22.315 km, ke alai semua penyampau nya  73.013km.

Sida mega dipadah ke alai Pakej A mungkur projek jalai ti nyendiaka jalai nuju Tekat Ai Baleh ke udah mujur digaga manggai 60 peratus. Pemansang kereja ba Pakej B iya nya ari Nanga Gaat ngagai Sungai Meramah lalu ke Nanga Merirai udah digaga naka 50 peratus.

Berebak enggau nya, Pakej C nyengkaum ngaga jalai enggau Jematan Sg. Merirai, Jematan Sg. Entalawan,  Jematan Sg. Sepanggil, Jematan Sungai Sebiro,  Jematan Sungai Nuri, Jematan Sg. Juan, Jematan Sungai Nansang enggau kereja ke bukai udah mujur naka 20 peratus.

“JKR Kandang Tengah Menua matau silik projek nya nyengkaum nyiri kunteriktor ngambika kerreja nya enda laun tembu ari timpuh ke ditetap sereta mega nentuka pekara pengelikun,” ku Masing.

Cassidy, ke meri penerang nya mega bisi madahka pemujur ke pemadu baru ba pengawa ngaga jematan, pangkalan enggau palan penyangkai kapal di Kapit.  

Tu nyengkaum Palan Penyangkai Kapal Komersial RC Kapit ti dijangka tembu digaga dalam bulan April 2019, lalu Pangkalan RC Nanga Ibau, Song, Kapit benung digaga lalu dulu ari ke timpuh ke ditetap sereta dipelaba tembu digaga dalam bulan Mac 2019.

Pangkalan RC Nanga Merit Kapit mega disadang tembu dalam bulan Mac 2019 enggau perambu jematan ke digaga meraka Sungai Kapit dipelabaka tembu digaga dalam bulan Mei 2020.

Projek ngaga begunan disadang tembu digaga ba taun  2019 nyengkaum ngaga Stesyen Betanam Betupi di  Nanga Machan sereta pengawa Meresi enggau Ngangkatmanah Fort Emma, Kanowit, nyengkaum perambu ngaga Dinding Tebing Sungai ti dipelaba tembu dalam taun 2020.