Anda di sini

Perintah chakah mai pemansang ngagai rayat Sarawak

 Harden betabi jari enggau ketuai komuniti ti bisi datai maya pengawa bejadika pengerami nutup program nya ditu, kemari.
NAMA BERITA: Harden betabi jari enggau ketuai komuniti ti bisi datai maya pengawa bejadika pengerami nutup program nya ditu, kemari.

SRI AMAN: Menteri Muda Pengelantang Komuniti Datuk Francis Harden Hollis madah, seriris enggau pemansang ti majak ditapi kitai kemaya hari, perintah seruran chakah mai pemansang enggau pengelantang ngagai semua serak komuniti di nengeri tu, kelebih agi peranak di kandang menua pesisir.

Ku iya, pengawa nya ulih dipeda nengah mayuh program pemansang ti udah, benung sereta deka dipejalai perintah nengeri ungkup pemaik sereta pengelantang rayat.

Iya ke mega Kababn Kunsil Nengeri (ADUN) Simanggang madah munyi nya lebuh ti bejaku maya bejadika Pengerami Nutup Program Pengelantang Komuniti ti diatur bepalan di Dewan Suarah ditu.

“Beserimbai enggau nya, kitai enda ulih agi semina duduk aja lalu ngarapka semua bantu enggau subsidi ari perintah aja. Tang, kitai patut nemu ngiga chara ti engkeman kediri, bisi inisiatif lalu ngerebut semua awak ke bisi disedia ngagai kita iya nya peluang dalam sektor industri, dagang, teknologi pemadah enggau komunikasyen (ICT), betanam betupi, pelajar, dagang temuai, servis enggau mayuh agi.

“Dalam konteks tu, kitai patut ulih mereti sereta nerima ubah sereta penemu baru enggau ngubah chara kitai berunding lalu bekereja ngambika enda tinggal ari arus pemansang ti majak tumbuh. Kelebih agi diatu kitai patut nyikap diri enggau penemu sereta pengelandik ti chukup dalam nyapai juluk menua kitai ti deka nyadi menua mansang ba taun 2020 ti deka datai,” ku iya.

Berindik ari nya, iya nambah agi madahka dalam napi jeman globalisasyen ti chakah enggau teknologi pemadah sereta komunikasyen, pengawa ngangkatka ‘Komunikasyen Pemansang’ nyadi siti pekara ti pemadu dikemerat enggau pemisi peminta dikena nempa komuniti ti ngembuan penemu sereta penerang tauka ‘K-society’.

“Nya alai, kuasa berunding dalam komuniti sereta tikas pengulih kitai ngaga inovasyen patut dikemerat ngambika sida ulih besemekih sereta napi penguji dalam sektor sosio-ekonomi kemaya hari. Enggau chara tu, kitai deka ulih muka runding, ngubah ulah sereta penemu, meransang komuniti ngambika sida ngemeratka penemu sereta nerima enggau nguji idea baru ngagai pengawa nambahka kualiti enggau tikas pengidup sida.

“Pengawa bekunsika penerang bekaul pemansang tu patut nyadi agenda keterubah perintah ti disadung nengah opis enggau ejensi pemansang sida. Taja pia, tikas penegut enggau naka ni pengawa nya ulih diterima deka nyadi manah agi nyema nya digaga enggau holistik lalu mungkur mayuh raban baka ketuai komuniti, raban ba sektor peribit, raban media sereta gerempung ukai dikuasa perintah (NGO) enggau raban volunteer,” ku iya nerang enggau silik.

Beserimbai enggau nya, Komuniti Pemansang enggau Pengelikun Genturung Pendiau (JKKK) iya nya sebuah entiti ti mega tanggungpengawa mai pemansang ti udah dilangkar perintah di renggat genturung pendiau. Pengawa tu patut disukung enggau kerejasama di renggat komuniti ngambika ulih nyamin tikas penyulut pengawa nya.

“Enggau tu, JKKK patut nengah chara teori sereta praktikal mansang bejalaika pengawa komunikasyen pemansang ti engkeman di renggat baruh. Tu endang berat laban ti deka nerima pemaik iya nya raban ti ditagit dikena nentuka tunga sereta chara bejalaika operasyen nya,” ku iya nyemetak.

Sama bisi datai ba pengerami nya Pengari Residen Bagi Menua Sri Aman Crispine Francis, Pemancha Lee Siang hua, bini Harden, Datin Simba Nalang, ketuai opis perintah sereta ketuai raban bansa ke bukai.