Anda di sini

Peragam enggai nulung enggau ngemelu ex-orang jil patut diiar

KOTA SAMARAHAN: Peragam mensia mayuh ke ngumbai raban ex-orang dijil enda ibuh ditulung sereta dikemelu patut diiar.

Pekara nya dipansutka Direktor Parol enggau Servis Kominiti Opis Rumah Jil Malaysia (JPM) Komisioner Rumah Jil Ibrisam Abd Rahman na program ‘Temuseru’ JPM Parol enggau Servis Komuniti Sarawak ba Sekula Primari  (Agama) Ibnu Khaldun ditu, kemari.

“Kitai patut sedar bala pesalah tu maya abis timpuh ukum jil deka pulai begulai baru enggau mensia mayuh.

“Enggau nya beri peluang kedua ngaga ex-orang jil lebih agi Orang DiParol, kitai chukup ngarap pengawa tu ulih nulung sida pulai berandau sereta ngereja ulah ke manah begulai enggau komuniti lalu nyaup ngelantangka mensia mayuh,” ku iya.

Iya nyemetak madah, nyema mensia mayuh terus ngemeluka raban tu, pengingin sida deka nandu pengawa jai chukup tinggi.

“Nya alai, aram kitai bela meri sukung ngagai sida (ex-orang jil) ngambika sida enda nandu penyalah ke udah digaga suba,” ku tandu Ibrisam.

Berebak enggau nya, iya nesau mensia mayuh ngambi bagi belajarka tanggungpengawa meri peransang ngemujurka  sistem Parol tu.

Ngelansa pasal sistem Parol iya madah, nya endang pengawa ke patut diperunding dikena ngurangka penyampau residivis iya nya tikas orang jil dipasuk baru ngagai rumah jil nengah proses ngajar Orang DiParol.

“Diatu JPM ngemansang Program Kolaborasi Pintar entara opis enggau ejensi, opis bekanun, serikat enggau serakup ti nyendiaka latih pengelandik ngagai Orang DiParol.

“Nengah peluang baka tu,arapka Orang DiParol ulih ngerembaika penau diri lalu nambahka penatai pemisi diri enggau enggau diri sebilik,” ku iya.
Dulu ari nya, Direktor JPM Sarawak Ajidin Salleh madah Sistem Parol dipejalai kenyau 2008 lalu naka tu urung 1,008 orang jil udah dilepas pengudah masuk Perintah Parol ba nengeri tu.

Nya alai, bepelasarka statistik nya semina sekeda aja tauka kurang ari tiga peratus orang jil ke diparol ngelanggar Perintah Parol.

Iya madahka, nya engka kurang dikeibuh diri sebilik tauka peragam mensia mayuh ke agi ngemeluka raban tu.