Anda di sini

CWS kiruh mantu peranak ke tasah angus dalam kandang menua Miri

 Tuai Rumah Usek (tiga kanan) nerima bantu barang pemakai ari Monsignor Francis Kulleh (dua kiba). Nyempulang iya (ari kanan) Alexius, Marcus enggau Henry.
SINU: Tuai Rumah Usek (tiga kanan) nerima bantu barang pemakai ari Monsignor Francis Kulleh (dua kiba). Nyempulang iya (ari kanan) Alexius, Marcus enggau Henry.

MIRI: Servis Ngintu Pengelantang Katolik (CWS) di Miri, Bintulu, Marudi, Baram enggau Limbang enggau semua dalam Kandang Pegai Garija Miri udah kiruh nganjung bantu penusah ngenyit ngagai raban ke tasah angus ba beberapa rumah panjai enggau kandang pegai gerija nya, rumah panjai enggau rumah ti angus lengis dalam bulan nyin tadi.

Kena 30 November, CWS Miri betuaika Monsignor Francis Kulleh, Paderi Parish ari St. Michael Parish Batu Niah, Miri udah nyuaka bantu ngagai peranak Rumah Usek Sumpit di Sungai Keriuk Niah ti tasah pengudah rumah panjai sida angus kena 24 November.

Nyempulang Monsignor Francis iya nya Marcus Hugo Matu, Chairman CWS Miri enggau beberapa iku kaban exco nyengkaum Alexius N. Munan (Mandal Chairman) enggau Henry Tanging (Penulung Sekretari).

Marcus madahka Monsignor Francis nyuaka bantu mata duit (belanja diulih ari Misa Minggu Khas) ari Katolik St. Michael Parish Niah lalu iya empu nganjung bantu barang pemakai enggau mata duit ari CWS ngagai Tuai Rumah Usek

Nitih ku Tuai Rumah Usek lebih 300 iku peranak nadai agi endur diau pengudah rumah panjai 49 pintu angus lengis ba penusah nya. Nadai sebarang penusah bebadi nyadi. Diatu sida ti tasah diau nyemilik kaban belayan enggau bala bakih sereta mega bedampa besemak enggau taba rumah panjai ti angus.

Kelimpah ari Rumah Usek, CWS mega nganjung bantu ngagai sida ti tasah ari penusah ngenyit ba enggau kandang ngelingi Miri, Bintulu, Marudi, Baram nyengkaum Limbang.

“Minggu nyin tadi CWS nganjung bantu 200 kutak gari ke udah dikena nyengkaum barang pemakai enggau mata duit ngagai Ketuai Kampung, Martha Bilong (tasah angus) ari 30 pintu rumah panjai Kenyah di Uma Bakung Sungai Asap di Belaga.

Tuju pejalai kitai mujur nengah kerejasama ari Tim Offroad 4WD Belaga ti ngena 10 buah entukar 4WD dikena nanjung bantu,” ku Marcus madah ngagai The Borneo Post apin lama  udah.

Ku iya, minggu nyin tadi, tim CWS Miri ke bukai mega udah nganjung bantu barang pemakai enggau barang diguna bukai sereta mata duit ngagai sida ti tasah angus rumah ba Kampung Merican, Miri lalu tim Bintulu nganjung bantu ngagai sida ti tasah angus rumah ba Kampung Assykirin Bintulu.