Anda di sini

Penyikap ATM seruran dikemerat dikena nentuka pengelikun menua

KOTA SAMARAHAN: Penyikap raban Medan Timur Tentera Darat seruran dikemerat ba pengawa nentuka pengelikun menua lebih agi Sabah enggau Sarawak ba tikas ke pemadu tinggi.

Pangliman Medan Timur Leftenan Jeneral Datuk Wira Zamrose Mohd Zain madah, pengulih enggau penegap pendiau raban tu deka ngasuh rayat andal ati ngagai soldadu lebih agi Raban Soldadu Malaysia (ATM) ti nyadi terabai menua.

“Tu mega dikena nyukung juluk enggau niat Panglima Raban Soldadu enggau Panglima Soldadu Darat dalam nentuka kitia nyadi sebengkah raban dibasa sereta seruran disikap dikena nentuka pengelikun menua tejamin,” ku iya.

Iya madah munyi nya rambau Pengawa Baris Perintah Keterubah Panglima Medan Timur Soldadu Darat di Padang Kawad Kem Muara Tuang ditu, kemari.

Berebak enggau nya, Zamrose minta raban ke dijaga iya terus ngatur pengawa enggau manah ke pemaik nama  Pemerintah Medan Timur Soldadu Darat nyadi sebuah tim ke ulih dikearap, lanchat ngereja pengawa, dinamik enggau ulih mutarka teknologi ke pemaik pengarap, bansa enggau menua.

“Aku mega nesau semua raban soldadu ke dikuasa Pemerintah Timur ngambi sama ngemeratka pekara pemun Perintah Keterubah Panglima Raban Soldadu enggau Perintah Keterubah Soldadu Darat iya nya nyadi raban profresional, penegap nyikap diri, penegap organisasi enggau ngenegap agi kualiti pengidup sereta ngemeranka ASAS (Amal, Sistem Pemerintah Renjimental, Adaptasi enggau Siap Siaga),” ku iya nyemetak.

Kelimpah nya, iya mega ngasuh ngatur ‘nikal baru ngagai pemun’ lalu temegah nyadi kaban soldadu sereta terus ngemeranka ulah nya ba genap raban Medan Timur.

Beduduk ari nya, ku iya soldadu darat merambu deka ngatur Latih Medan Renggat Briged ba kededua Pemerintah Medan ti deka dipejalaika sereta taun 2019 nyadi aktiviti besai Hari Ulang Taun Soldadu Darat.

“Kelimpah nya, seriris enggau peminta nya, atur strategik ‘TD Army 2 10+10’ deka ditukar enggau  ‘Army 4 Next G’ fokus ngagai penyikap pengering soldadu darat ba selampur menua,” ku iya.

Pengawa baris nya disempulang 162 iku pemesai enggau

1516 kaban soldadu lain-lain pangkat ari raban ke dikuasa Pemerintah Medan Timur Soldadu Darat.

Pengawa baris nya betuaika Pemesai Pemerintah 4KAD Leftenan Kolonel Shamzaini Misran.