KUCHING: Pansik silik patut dipejalai enggau jampat bekaul enggau penusah meletup ti nabanka nyawa tiga iku ba palan bebelika barang CityONE kena Hari Dua.
Seraya ngenataika penyinu ati ngagai sida nya sebilik ngarika Perintah Sarawak, Sapit Kepala Menteri Datuk Amar Douglas Uggah Embas madahka iya ngarapka ripot silik ulih disedia enggau naka penyampat dikena nagang penusah ke sama nyadi dudi hari.
“Penusah tu chukup ngasuh ati sinu, nyadi ba tengah mengeri besai Kuching. Kitai ngarapka diri ulih nerima ripot enggau naka penyampat ari bomba enggau raban opis bekaul ngambika ulih beratika baru semua proses enggau prosedur nama kebuah pekara nya tau nyadi,” ku iya ti mega Chairman Komiti Mutar Penusah Ngenyit Nengeri lebuh ngabas palan ti meletup ditu, malam Hari Dua.
Penusah nyadi urung pukul 3.30 lemai ti nabanka nyawa O Kui Lim 49, enggau Tchee Kiom Joong, 24, bela datai ari Kuching sereta siku peranak Pulau Pinang, Chin Hsien Loong, 29.
Ba penusah nya, diripot 41 iku bakal nyengkaum empat iku bakal balat.
Servis unit Ukui Penyidi (K9) bomba mega dikena nentuka nadai orang tepekul ba begunan ti runtuh dipelaba nyadi ketegal gis meletup.
“Ari perati mata diatu endang nadai agi (orang tepekul). Tang sida (raban nyaga pengelikun) deka nentuka nadai agi orang laban penusah tu bekaul enggau nyawa,” ku iya.
Asil ari pengawa meresa enggau matau raban bomba ku iya, penusah tu nadai ngeruga seksyen bukai ba komplek nya.