Anda di sini

Kebuah penusah meletup nyadi ba CityONE patut dipadah ngagai mensia mayuh

Advertisement

KUCHING: Raban bekuasa bekaul patut mansik silik penusah meletup ba Palan Bebelika Barang CityONE dikena nentuka pun penusah nyadi.

Chairman Palan pengelikun enggau pengerai Pengereja Pengawa (NIOSH), Tan Sri Lee Lam Thye madah asil pansik penusah ti nabanka nyawa nya patut dibantai ngagai mensia mayuh.

“Raban bekuasa bekaul patut mansik silik penusah tu dikena nentuka pun penusah enggau pekara ti ditemu patut dipadah ngagai mensia mayuh.

“Seraya nganti ripot silik penusah nya, aku nyemetak madahka tu nyadi tanggungpengawa pengaji nyendiaka latih enggau kereban nyaga pengelikun diri (PPE) seraya bala pekereja, nyadi tanggungpengawa sida ngena iya,” ku iya nengah penerang berita kemari.

Nya alai ku iya, pengaji nyengkaum kunteriktor enggau subkunteriktor mesti bejalaika tanggungpengawa baka ti udah ditetap di baruh Akta Keselamatan dan Kesihatan Pekerjaan (OSHA) 1994 dikena nyeliahka penusah baka meletup ba Palan Bebelika Barang CityONE ditu nyadi, kena Hari Dua tadi.

Ku iya, penusah bebadi nyawa enggau bakal ba endur kereja tau diseliah enti semua kunteriktor bejalaika pengawa ti patut sereta bisi pelin ngatur pekara pengelikun ba semua endur kereja sida.

Ku iya nambah, OHSA 1994 udah madahka latih endang wajib lalu pengawa patut seruran dikemeran dikena nentuka pengelikun enggau pengerai pekereja ba endur kereja.

Ku iya, pengaji enggau kunteriktor ti enda nyendiaka rampa kereja ti likun enggau manah ungkup pekereja sida tau ditinggang atur di baruh Seksyen 15 OHSA 1994 ti mai ukum abis mayuh RM50,000 tauka jil dua taun tauka kededua nya.

“Ari baruh OHSA 1994 udah nyadi tanggungpengawa pengaji enggau pekereja nentuka pengelikun enggau pengerai ba endur gawa lalu sida ti enda ngereja pengawa nya tau kena tinggang ukum tauka dibai ngagai kort,” ku iya madah nyemetak.

Kelimpah ari nya ku iya, pekereja mega patut sedarka hak sida ngulihka PPE ti tau mantu nyelamatka nyawa sida kelebih agi ba endur kereja bisi risiko tinggi.

Di baruh OHSA 1994, ku Lee, pengaji ti enda nyendiaka PPE ngagai pekereja tau diukum enda ngelui ari RM50,000 tauka jil abis lama dua taun tauka kededua iya.

“Pekereja ti ditemu salah laban enda ngena PPE mega tau diukum di baruh Seksyen 24 Akta ti sama ti nyendiaka ukum enda ngelui ari RM1,000 tauka jil enda lebih ari tiga bulan tauka kededua,” ku iya.

Berebak enggau nya, Opis Bomba enggau Penyah Penusah ngenukaka tiga iku parai enggau 41 iku bakal ba penusah meletup ba CityOne Megamall ti nyadi urung pukul 3.30 lemai kena Hari Dua tu tadi.

Tiga iku ti parai ba penusah nya benama O Kui Lim, 49 enggau Tchee Kiom Joong, 24, seduai tu bela ari Kuching lalu siku agi, Chin Hsien Loong, 29, ari Butterworth, Pulau Pinang.

Dua iku ti bebadi nyawa dipechaya pekereja restoran, ti benung nyendia kereja ungkup pengawa muka premis nya kemari.

Advertisement