KUCHING: Peminta ngerejista Gabungan Parti Sarawak (GPS) ti udah dikemendarka Opis Menteri Dalam Nengeri (KDN) enggau Opis Pengerejista Gerempung (ROS), meri peluang ngagai parti asal Sarawak nya mekuh sereta nyikap diri napi Pengawa Bepilih Nengeri Ke-12 (PRN12) ila.
Penganalisis Politik, Dr. Saudi Narani madahka pemutus nya mega siti pemujur ngagai GPS sereta udah sah ari segi undang-undang kelimpah ari udah ulih mekuh nyerakupka rayat.
“Tu pemungkal ti positif ngagai sida (GPS) berengkah sereta ngatur strategi dikena napi Pengawa Bepilih Nengeri Ke-12 (PRN12) ti disadang diatur pemadu laun ba taun 2021.
“Politik Sarawak lebuh manggai ba maya PRN12 ila deka richah agi. GPS ulih majak chakah meri servis ngagai mensia mayuh kelebih agi di menua pesisir dikena ngulihka sukung sereta ngambi baru populariti sida.
“Pemujur ngerejista tu mega besai reti laban penumbuh GPS dalam politik Sarawak udah dianggap sah ari sukut undang-undang. GPS ulih mekuhka pengawa nyerakupka rayat enggau nadai sebarang penanggul,” ku iya madah ngagai Utusan Borneo, nyema Pakatan Harapan (PH) enda bejalaika pekara ti sama sereta agi lantang ati pengudah menang ba pengawa bepilih besai ke-14 (PRU14) sida ulih lenyau sukung.
Saudi meri penerang iya lebuh ti ngenang pasal ROS enggau KDN ke udah ngemendarka peminta ngerejista GPS ti dibantaika Menteri Dalam Nengeri Tan Sri Muhyiddin Yassin ba Dewan Rakyat apin lama.
GPS sebengkah gempung parti asal Sarawak iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Sa’Ati Rayat Sarawak (SUPP) enggau Parti Demokratik Progresif (PDP), ti ditumbuhka pengudah PRN11 sereta pengudah ngaga pemutus ningkilka diri ari Barisan Nasional (BN).
Bejaku baru, Saudi madahka pemutus peminta ngerejista GPS ti udah dikemendarka nya ukai semina besai reti ngagai gempung nya empu tang mega perintah besai ari baruh PH.
Pemutus ngemendarka penumbuh GPS ti kurang ari timpuh enam bulan mega dianggap ke pemadu jampat ba pengawa ngemendar numbuhka parti politik, ku iya.
“Pemendar ngerejista GPS tu mega besai reti ke alai perintah besai dipegai PH nyadi sebuah perintah ti nadai bechiping dalam pengawa berundingka pekara nya.
“Pemutus nya ngayanka perintah PH ukai perintah ti enda rasional sereta pilih baka ti dipadahka sekeda orang,” ku iya.
Kelimpah ari nya Saudi lebuh ke ngenang sukung politik ba nengeri tu, iya madahka GPS ke sebedau tu ke nyadi parti komponen BN mengkang nerima sukung ari mensia mayuh.
“Bepelasarka perati tauka utai ke dipeda aku enggau interbiu enda formal ari renggat ke baruh, GPS agi mayuh kubu kuat di Sarawak. Raban pengawa bepilih sida endang agi idup, tang ngetu enda lama laban agi kesal ati ketegal pengawa bepilih sebedau tu.
“Sida ulih berengkah enggau ‘jump start’ ,lalu nyema sida mujur jump start, sida deka ulih ngetanka perintah,” ku iya.
Bejaku baru, iya madahka nyadi penyakal ukai suah punas enti bisi penyukung ti taluk.
Ambika chunto ku iya, Kelantan sida iya penyakal bepuluh taun ke lama udah, enda ngira sapa ke megai perintah besai.
“Sarawak mega muka jalai ngagai gaya ke sama. Menang ba PRN 2021 nadai penanggul ba GPS, nyema gaya nya agi tetap sama ‘cateris paribus’,” ku iya ti mega nyadi Pengelicha Kanan Sains Pentadbiran dan Pengajian Polisi UiTM Sarawak.