KUCHING: Penemu Menteri Pelajar Dr Maszlee Malik ti deka nyadika kulam nyemerai hotel endur nembiak sekula belajar nyemerai ke lalu sebengkah ari tangunggpengawa rama korporat (CSR) hotel, enda praktikal dipejalaika lebih agi ba nengeri tu.
Menteri Pelajar, Sains enggau Pemansik Teknologi, Dato Sri Micheal Manyin Jawong madahka, ba Sarawak mayuh sekula sereta tebal agi di menua pesisir kelimpah ari enda semua hotel ba nengeri tu bisi nyendiaka kulam nyemerai.
"(Penemu nya) Naka ke diatu enda praktikal.
"Ba Sarawak aku ngasaika tu enda ulih dipejalaika laban keterubah, kitai nadai mayuh hotel ke bisi nyendiaka kulam nyemerai lalu kitai bisi 1,457 buah sekula ti tebal agi di menua pesisir," ku iya lebuh dikerandau raban pengarang berita sehari tu.
Manyin mansutka penemu iya lebuh dipinta meri penerang bekaul enggau perambu Opis Menteri Pelajar ke deka nyadika kulam nyemerai hotel alai nembiak sekula belajar nyemerai.
Dulu ari nya iya bejadika Student Innovation Excellence Appreciation Ceremony ke diatur opis menteri iya ba Galeri Pustaka Negeri ditu.
Bejaku baru Manyin madahka kulam nyemerai hotel nya endang ungkup orang ti bemalam tauka nyuwa ba hotel nya.
"Kitai bisi palan akuatik nya pan semina siti aja, tang kitai bisi 1,457 buah sekula ti tebal agi di menua pesisir, nya alai bakani deka mai nembiak kia lalu tu begunaka belanja besai.
"Sarawak ukai baka menua Singapura, kitai ari tu (Kuching) ke Miri ke Kapit udah 800 km, ba Kapit din aku enda nemu sekalika bisi kulam nyemerai tauka nadai. Ba Serian nadai," ku iya.
Nyema nya nyadi sebengkah ari CSR piak hotel sapa ti deka nyaga nembiak, lalu nyema bisi sebarang pekara ti dikeenggai nyadi sapa ti deka ngambi tanggungpengawa nya sekalika piak hotel tauka sekula?, ku iya.