Dikarang Judan Bungap
SIBU: Perintah nengeri chakah nambahka tikas pengelaju internet ba genap menua di Sarawak dikena nyendiaka perengka guna internet ti chukup ngagai raban nembiak.
Kepala Menteri Datuk Patinggi Abang Johari Tun Openg madah, pemansang tu beguna bendar ba tuju nyikap nembiak nyadika ganti megai menua dudi hari.
"Aku pechaya meda pengelandik raban nembiak maya hari tu ti ngepunka kitai numbuhka pemansang ekonomi digital ditu.
"Ketegal nya, perintah nengeri chakah nambahka tikas pengelaju internet ngambika nembiak ulih ngiga penemu ke manah agi nundaka peminta sida," pia ku iya maya bejadi Pengerami Hari Raban Nembiak Renggat Nengeri Sarawak 2018 ba Stadium Tertutup Sibu ditu, sehari tu.
Kelimpah ari nya, Abang Johari mega madahka perintah nengeri chakah ngemansangka palan pelajar tinggi dikena nambahka kus ti bekaul iya ke beguna ngagai pemaik nengeri tu ila.
"Reti iya, kitai bisi disiplin ti nyadi penabat dudi hari ngambika enda suntuk penemu enggau pengelandik mai nengeri mansang," ku iya madah baru.
Ba tuju ke sebaka ku iya, program Indeks Belia Negeri Sarawak (ari baruh Komiti Pemansang Raban Nembiak Sarawak) dipejalaika dikena nyidi pengelandik raban nembiak.
"Pansik tu dikena kitai ngumpul penerang bekaul enggau tikas raban nembiak.
"Ari nya kitai deka nemu enti kitai bisi nembiak ti betikas tinggi diatu dia dudi hari ila kitai mega deka bisi rayat betikas tinggi," pia ku iya madah.
Ba pengerami tu tadi, iya mega dipebasa nyuaka Anugerah Belia Nengeri Sarawak enggau Anugerah Persatuan Belia Negeri.