KUCHING: Nyendiaka kelas ngaga tumpa nunjukka pengeran enggau pemendar Akademi Serakup Dayak Iban Sarawak (ASADIA) keran deka ngangkat, ngerembai sereta ngetanka ngepan asal Iban.
Tumpa iya nya siti ari kereban asal Iban dikena ngias lengan orang indu maya ngena ngepan.
Nitihku Ketuai ASADIA Mabong Unggang,juluk ngatur kelas nya laban endang deka ngerembaika penmu enggau pengelandik begagaka ngepan asal Iban kelimpah ari belajar ngaga tangu tauka marek empang sereta ke bukai.
Iya ngarapka pengelandik enggau penemu begaga ngepan asal nya, bala pesereta ulih nampung sereta ngerembaika nya ngagai orang bukai lebih agi rebak baru enggau dudi awakka enda ngetu ba rebak diatu.
“Tuju kami (ASADIA) ngatur kelas tu awakka ulih ngerembaika pengelandik enggau penemu ngaga ngepan asal.
“Lalu ngena penemu ke udah dikembuan nya ila, aku ngarapka sida ti belajar sereta landik ngaga tumpa tu ulih ngerembaika penemu tauka pengelandik ngagai raban bukai,” ku iya madahk ngagai Utusan Borneo.
Tumpa iya nya sebansa ias(perhiasan) gelang ti digaga ari tembaga tauka aluminium ti bersalut perak ti dikena ba lengan.
Tiap saiz gelang bisi bida iya nya ari saiz mit ngagai saiz ti besai.
Lalu tumpa rajang iya nya sebansa ias gelang ti digaga ari tekuyung tasik.
Bisi mega tumpa digaga ari perak. Iya dikena ba lengan sereta berasai sendat maya ngena.
Kelimpah ari nya Mabong mega madahka pengelandik enggau pengawa begagaka kereban ias baka tumpa ulih mantu nyungkakka ekonomi diri tauka ruang bilik.
Iya madahka orang ke udah landik ngaga tumpa ulih nyual asil sida lalu nyadika nya sebengkah kereja dikena nambahka penatai pemisi.
“Siti agi tuju kami ngatur kelas tu mega, ngarapka nengah pengelandik sida ulih nambahka penatai pemisi ngena chara bejualka ngepan ti digaga diri empu.
“Baka ke ditemu kitai, diatu mayuh ngepan kitai diberi ari menua sepiak,” ku iya madahka kelas nya diajar Annie Chai siku orang ti landik ngaga ngepan asal Iban.
Mabong berebak enggau tu jemah ila bisi orang nengkebang injin tauka mesin dikena ngaga ngepan tauka keraban kitai Iban ngambika mayuh ulih digaga, dijual sereta dikena nangkup peminta.
Kelimpah ari belajar ngaga tumpa, raban tu mega bisi belajar ngaga simpai iya nya sama ngepan asal Iban.