Dikarang Rengenyan Labang
KUCHING: Perintah nengeri udah ngemendarka agih belanja RM5 juta ngagai Opis Menteri Dagang Temuai, Seni, Main Asal, Nembiak enggau Lumba enggau Main dikena mantu ngelatih sereta nyikap orang dagang biak ti baru deka ngepunka dagang.
Kepala Menteri, Datuk Patinggi Abang Johari Tun Openg madahka, agih belanja nyadi modal dagang awakka pengelandik nengkebang enda ngira nama dagang ti dipejalaika ulih nyadi nyata.
"Sehari tu aku meri agih belanja sepenyampau RM5 juta ngagai Opis Menteri (Dagang Temuai, Seni, Main Asal, Nembiak enggau Lumba enggau Main) Datuk Abdul Karim Rahman Hamzah dikena mantu nyikap orang dagang biak ba Sarawak ti baru deka ngepunka dagang.
"Kitai (perintah nengeri) meri agih belanja ti nyadi modal dagang tu berengkah bulan Januari taun baru.
"Modal dagang tu dikena opis menteri mantu nembiak, kitai ngarapka tu ulih mantu kita ngepunka pengelandik nengkebang ngagai nyadi nyata," ku iya lebuh bejaku nyerumba bejadika aum besai TEDxKenyalang 2018 ba Bangunan DUN lama, sehari tu.
Nambahka nya, iya madahka orang dagang biak ke deka ngena modal dagang tu patut nganjung keretas kereja ngagai piak TEDxKenyalang sereta disarap dulu sebedau dianjung ngagai opis menteri.
"Modal dagang ti diberi nya bepelasarka keretas kereja kita ti udah disarap ulih TEDx, laban sida TEDx tu nemu bagi.
Bejaku baru iya madahka perintah nengeri deka bekunsi asil penatai pemisi enggau raban nembiak nyengkaum ba pengawa dagang.
Tambah mega ku iya, berengkah taun 2019 Sarawak bejalaika chukai jual 5 peratus produk petroleum.
"Aku deka bekunsi duit ke ulih kitai ari asil minyak enggau gis laban kitai deka bejalaika chukai jual lima peratus minyak enggau gis. Aku ngasaika bisi duit nya alai alu deka meri ngagai orang biak," ku iya.