BINTULU: Perintah nengeri udah mujur nyukat kelingi tanah di selampur nengeri tu ti ngembuan pemesai 870, 265 hektar tauka 2,150,425 ekar naka bulan Oktober taun tu, lalu 687, 258 (1,698,215 ekar) udah di gazet nyadi Rizab Komunal Bumiputera Seksyen 6 Kanun Tanah Nengeri ari baruh Program Nyukat Tanah Hak Adat Bansa Asal (NCR) Inisiatif Baru.
Sapit Kepala Menteri ke mega Menteri Pemansang Mengeri Enggau Pengeraja Asal Kedua sereta Menteri Industri enggau Pemansang Pengawa Dagang Datuk Amar Awang Tengah Ali Hassan madah, tikas pemujur pengawa nyukat kelingi nya mega udah mungkur kandang menua di Bintulu enggau pemesai 60,277.93 hektar (148,950 ekar) lalu ari pemesai nya, bisi 39,494.7 hektar (97,593.5) udah di digazet.
Dalam program kedua ku iya, kandang menua ari baruh Seksyen 6 nya deka disukat nitihka lot individu lalu naka ke diatu 22,983 lot individu udah mujur disukat ti udah mungkur kandang menua 28,807 hektar (71,182 ekar) pemesai udah sereta deka dberi surat pala tanah ari baruh Seksyen 18 Kanun Tanah Negeri.
Ku iya, di Bintulu bisi 1,255 lot individu udah mujur disukat ti ngaul kandang menua pemesai 2,607.54 hektar (6,443.37 ekar) udah sereta deka dikeluarka surat pala tanah ari baruh Seksyen 18 Kanun Tanah Negeri ke mega minta saup orang ti beempu tanah meri kerejasama penuh dalam kereja nyukat tu kelebih agi ti ngaul lot tanah individu.
“Enggau pengawa nya udah mandangka perintah nengeri udah ngamaika semaya ari baru Seksyen 6 Kanun Tanah Negeri, nyukat lot individu lau ngemansutka surat pala tanah Seksyen 8 Kanun Tanah negeri,” ku iya madah dalam teks iya ke dibacha Menteri Muda Perambu Mengeri, Pengatur Tanah enggau Rampa Menua Datu Len Talif Salleh ba Pengerami Nyuaka Surat Pala Tanah enggau Gazet Rizab Komunal Bansa Asal ti bepalan ba Auditorium Kaunsil Pemansang Bintulu (BDA) Wisma Bintulu kemari.
Dalam 10 taun ke udah, ku iya, perintah besai ke sebedau tu udah meri agih belanja RM161 juta dikena pengawa nyukat kelingi tu enggau ngagihka RM20 juta ninting taun tang dalam pengawa bejuraika Bajet 2019 ke udah dibantaika Menteri Wang perintah besai nadai nyebut agih belanja ungkup Opis Tanah enggau Survei (JTS) bejalaika pengawa nyukat kelingi nya ungkup taun ti deka datai sereta taun ke bukai.
Berindik ari nya, ku iya, perintah nengeri ari baruh pegai Gabungan Parti Sarawak (GPS) berapa hari ke udah nengai Sapit Kepala Menteri Datuk Amar Doughlas Uggah Embas udah madahka deka meri agih belanja RM40 juta dikena neruska pengawa nyukat kelingi nya.
Iya madah, batang tuju pengawa nyukat iya nya dikena ngenukuka garis entara tanah orang ti beempu tanah lalu dikena bejalaika poses nyukat nya patut nengah proses nasat ti silik dikena nyeliahka hal nya besibil.
“Kitai meda JTS diatu udah ditumbuh 100 taun, lalu bisi pengelandik sereta peneleba ngatur pengawa nyukat tanah nyengkaum pengawa mansik enggau ke bukai nya alai kerejasama ari rayat endang beguna dikena JTS neruska pengawa nya lalu ngemuntangka kereja sida ungkup pemaik rayat di nengeri tu,” ku iya.
Iya madah, nama ti pemadu berat iya nya proses ti disediaka perintah kenyauv ari 100 taun ke udah digaga baru enggau undang-undang ti udah bisi dalam kanun tanah negeri lalu ke deka dikemendar dalam taun 1954 ke pengelama 64 taun kanun tanah tu udah disediaka sereta dikemendar dalam Kunsil Nengeri (DUN) Nengeri Sarawak ari baruh perintah James Brooke enggau perintah kolonial British.
“Proses nyukat nya ngena sistem ti moden lalu maya Ratu Britain Elizabeth II dichiri kena 6 Februari 1952, dua taun udah nya (1954) iya udah ngasuh nengah kuasa ke diberi ari baruh Colonial Boundaries Act 1895 ngemendarka kandang menua Sarawak nyentuk 200 kilometer ngagai tasik ke meri nengeri tu hak ba minyak enggau gis sereta nyadika sebuah nengeri ti numbuhka Malaysia enggau jaku bukai undang-undang tu enda ulih ditukar di Parlimen bakanya aja,” ku iya nyemetak.
Sama bisi datai Menteri di Opis Menteri Besai (Integriti enggau Ombudsman) ke mega Kaban Kunsil Nengeri (ADUN) Jepak Datuk Talip Zulpilip, Menteri Muda di Opis Kepala Menteri (Undang-undang enggau Adat Bansa Asal) ke mega ADUN Kakus Datuk John Sikie Tayai, ADUN Samalaju Majang Renggi, Resden Bagi Menua Bintulu Jack Aman Luat, Sapit Direktor Operasyen JTS Sarawak Kueh Hui Urg sereta Penguasa JTS Bintulu Kiu Chiong Chong.