Anda di sini

Projek jematan Sungai Rambungan ditampung

 Jamilah (dua kiba) begulai enggau bala pengari rayat maya ngulu aum kunsil nengeri.
BAUM: Jamilah (dua kiba) begulai enggau bala pengari rayat maya ngulu aum kunsil nengeri.

KUCHING: Rayat ke nguan sitak Kunsil Nengeri Tanjong Datu gaga ati projek ngaga jematan meraka Sungai Rambungan ulih terus dipejalaika nengah Bajet 2019 perintah nengeri.

Nitihku Datuk Amar Jamilah Anu (PBB-Tanjong Datu) projek ngaga jematan nya udah lama diperambu sereta dikemendarka perintah besai sebedau tu.

Taja pia ku Jamilah, projek nya udah dikinsil perintah besai enggau nadai meri seberang tegal ke tegap ke chukup ngasaka ati rayat dalam sitak ke diarika iya.

“Tang diatu aku sereta semua rayat Tanjong Datu lebih agi sereta Sarawak amat beterima kasih ngagai YAB Kepala Menteri, ti udah nyendiaka ungkup belanja di dalam Bajet 2019 dikena nampung pengawa ngaga jematan Sungai Rambungan tu.

“Tu ngayanka pengibuh YAB Kepala Menteri enggau perintah nengeri ngagai peminta enggau pekara ti diguna rayat.

“Baka ke dipadahka ngagai aku pengawa tumu udah dipejalaika ulih JKR sebedau dikinsil  ngenyit ulih perintah besai.

Nya alai aku ngarapka pengawa nyambung baru projek tu dipejalaika enda lama agi,” ku iya.

Jamilah mansutka pekara nya lebuh ti bejuraika Rang Undang-undang Perbekalan (2019), 2018 enggau usul Merujuk Resolusi Anggaran Pembangunan bagi Perbelanjaan Tahun 2019 ba hari ketiga, aum ke-2 penggal ke-3 Kunsil Nengeri (DUN) Ke-18 ba Bangunan DUN ditu, kemari.

“Jematan tu deka meri peluang ke besai dikena ngangkatka pengawa sosio-ekonomi rayat ba kandang menua tu,” ku iya.

Nambahka nya iya madahka perintah nengeri udah ngemendarka ungkup belanja dalam urung RM100 juta dikena nganti 8 buah jematan bailey enggau jematan konkrit ba sepemanjai jalai Rambungan-Sampadi-Lundu.

“Enggau penembu projek tu ila, pejalai ari mengeri Kuching ke Lundu enggau Sematan deka nyadi lebih lantang sereta likun.

“Asil betanam betupi enggau produk ke diasilka rayat menua tu mega deka enggau lebih muntang agi dijual,” ku iya seraya ngarapka projek jematan nya dipejalaika enggau lengkas.

Nambahka nya Jamilah minta ejensi ti bekaul ulih bejalaika Rumah Spektra Permata di Lundu sereta Sematan enggau lengkas, laban projek nya udah bisi diagihka belanja.

“Lundu enggau Sematan mega bulih agih belanja ari penyampau semua ungkup belanja sepenyampau RM141 juta dikena bejalaika projek pemansang pengawa berumah.

“Lundu enggau Sematan sama bela diungkupka ngaga enda kurang ari 50 unit RSP. Palan kededua endur projek tu udah disediaka,” ku iya seraya nyukung Belanja 2019 ke dibantai Kepala Menteri ba hari keterubah baum DUN Ke-18 apin lama.

Jamilah ngarapka ungkup belanja tambah ulih diberi dikena nambahka pemayuh unit RSP digaga dikena napi peminta guna ke nambah.