KUCHING: Bekau ari PKR Sarawak nyadi nengeri kepenudi endur pengawa bepilih parti nengah chara undi online e-voting kena ujung minggu tu, nyadi tentu pemutus iya mega deka nentuka chalun ti mangku penuduk besai ba Kaunsil Ketuai Tinggi (MPP).
Mensia mayuh berati pengawa bepilih PKR Sarawak nyadi ‘penentu’ baka ke udah diaku chalun sapit presiden parti Datuk Seri Mohamed Azmin Ali maya iya ngulu pengerami makai lemai PKR nengeri ditu, malam kemari.
Nadai nyebut nama orang ti ngelaban iya, Mohd Rafizi Ramli, Mohamed Azmin ti deka ngisi penuduk nya ngelalau kaban parti ba Sarawak ngundi ketuai ti ulih ngintu pengelantang kaban parti lalu anang alah laban politik wang maya hari bepilih nya.
PKR Sarawak betuaika chairman iya Baru Bian, ke mega Kaban Parlimen (MP) Selangau enggau Menteri Kereja raya, dipadahka setanah enggau Menteri Pekara Ekonomi nya.
Ari 29 Pampang ke ngatur pengawa bepilih ba Sarawak, Pampang Julau betuaika MP Julau Larry Sng, dipadahka setanah enggau kem orang ke dilaban, udah ngemegauka mensia mayuh - ngamahka pengawa bepilih parti laban dikumbai ngembuan kaban pelesu.
Kena 26 Jun tu tadi, Pampang Julau ngerikod penyampau kaban niki ngenyit iya nya ari 600 nyadi 13,000 sehari udah nya, tu meransang Ketuai Pemadah PKR negeri Vernon Kedit ngaga ripot ngagai Komiti Nagang Penyalah Makai Suap Malaysia (SPRM) ditu kena bulan nyin tadi dikena nentuka pengamat kaban nya.
Mohamed Azmin mega minta SPRM mansik silik lalu ngiga sapa orang ti ngereja pengawa nya bekaul status kaban pelesu nya.
Nambahka nya mega, Presiden PKR Datuk Seri Dr Wan Azizah Wan Ismail kena pejah laban ngena komiti perintah lalu nguna pengulih iya ke nyadi sapit menteri besai nemuai ngagai Julau enggau Sibu kena Hari Dua tu tadi lalu disempulang Sng beserimbai enggau pengawa bepilih parti.
Tinggal sehari agi pengawa bepilih parti, tebal agi palan muai undi ba sekeda pampang bedau diputus, sebagi agi ketegal penanggul enda ulih diseliah lalu pengawa bepilih baru chalun ba renggat pampang.
Chairman PKR Petra Jaya Baharuddin Mokhsen madah palan ungkup kaban ngundi chara online deka ditemu abis laun sehari tu. Taja pia, sida agi ulih ngundi nengah keretas undi. — Bernama