Anda di sini

Perambu alternatif bekal ai ba Engkilili patut diperunding

Advertisement

KUCHING: Pemadu penusah nadai ai ambika banding, “Ai kena bira kena kemi pan nadai”. Baka nya mih mandangka penyuntuk bekal ai ba sitak menua pesisir lebih agi ba genturung pendiau enggau rumah panjai di menua Engkilili.

Kaban Kunsil Nengeri (ADUN) Engkilili, Dr Johnical Rayong madah, taja konstituensi iya bisi loji bekal ai ba Engkilili, Sebeliau enggau Skrang tang bekal ai ari loji nya suah tejanggal nyentuk pengelama seminggu.

“Maya bisi pengerami baka jam melah pinang, program opis perintah tauka penusah rabat, maya nya mih penanggul ai nyadi ngujungka aktiviti tauka pengawa dikereja tejanggal lalu balat ngenusah peranak rumah panjai,” ku iya maya meri timbal ba Bajet Sarawak 2019 beserimbai enggau Aum Kunsil Nengeri (DUN) ditu, kemari.

Nya alai, dikena mutar penanggul ke udah balat tu, Dr Rayong merambu minya perintah ngaga alternatif bekal ai sekalika nya ai beresi tauka enda.

“Kitai enggai meda rayat terus ngarapka telaga enggau sungai endur mandi...kitai mega enggai agi meda sida mai baldi beangkutka ai ari sungai.

“Abis nadai, rayat ba sitak aku diberi tangki ungkup guna sementara,”ku iya.

Kelimpah nya, Dr Rayong mega merambu minta atur mutarka penanggul dikemerat ungkup sitak rumah panjai ba Batang Ai Ili, Skrang Ili, sitak Lidong Bangat, Tanjong, Enteban, Memaloi, Semueh, San Semanju, Merindun sereta Sg Keruh Engkilili.

Advertisement