Anda di sini

Saut ari menteri pelajar mayuh kelikuh, status projek sekula repuk ditangguh

Advertisement
 Gaya sekula repuk ke mujur dikemanah rambau pegai perintah sebedau tu.
JEMAN PEGAI BN: Gaya sekula repuk ke mujur dikemanah rambau pegai perintah sebedau tu.

KUCHING: Dua buah sekula repuk adap Utara Sarawak nyangka deka terus baka nya kandang beberapa taun deka datai laban menteri pelajar ari perintah besai mayuh kelikuh maya nyaut tanya senentang status projek ti udah dikemendarka raban ngatur pengawa sebedau tu.

Kaban Parlimen (MP) Sibuti, Lukanisman Awang Sauni pechaya dua buah sekula iya nya Sekula Primari (SK) Kita Niah enggau SK Rancangan Sepupok Niah ti beungkus sepenyampau RM73.2 juta deka diperatika baru lalu dipasuk ba lis deka seruran diperatika Perintah Pakatan Harapan (PH).

“Projek dua buah sekula tu dikemendar di baruh renggat kedua Atur Pemansang Malaysia Lumpar Ke-11 (RMK11) baka SK Kita, Niah beungkus RM43.2 juta enggau SK Rancangan Sepupok Niah beungkur RM30 juta udah ditangguh,” ku iya madah ngagai Borneo Post Online.

Lukanisman nyemetak madah iya kala nanya pasal projek nya ngagai Menteri Pelajar kena 25 Julai 2018 rambau aum Parlimen sebedau tu tang saut nadai entu nyenggala bebatang.

Ku iya, SK Kita, Niah deka bisi 12 kelas, 10 unit rumah pengajar, buding enggau penyikap perengka guna pemun bukai seraya SK Rancangan Sepupok, Niah deka ngembuan 36 kelas, enam rumah pengajar enggau perengka guna bukai.

“Kededua projek tu nitihka pematut dipejalai di baruh Opis Kereja Raya (JKR) Sarawak tang Menteri nimbal agi ba renggat sebedau digaga – nama reti jaku tu?” ku iya nanya, seraya nambah, lebuh menteri nya ditanya silik agi, iya nyaut, diperatika baru, reti iya deka diperatika baru.

Lukanisman berasai asa meda pengawa PH jauh besibil ari penetap sida ti dikemeranka sida, lalu jauh betingkah ari atur pengawa dikemeratka sida sebedau tu ti deka mutarka penanggul sekula menua pesisir ti repuk.

“Di baruh pegai perintah sebedau tu, kami mujur mutarka isu lima buah sekula repok ba SK Peninjau, SK Tanjong Berlipat, SK Beraya, SK Kelapa Sawit No 5 enggau SK Temengung Muip – empat ari sekula tu iya nya sekula menua pesisir ti repuk seraya SK Temenggung Muip iya nya sekula mengeri ti repuk,” ku iya.

Kesemua lima projek, nitih ku Lukanisman udah tembu ba timpuh ditetap ti digaga kunteriktor bekenaka Industrial Building System (IBS).

“Kita empu ulih meda kualiti kereja ba SK Kelapa Sawit No 5 dibida enggau buding lama ti repuk,” ku iya.

Nya kebuah Lukanisman ngarap projek ti ditangguh deka diberi pemerat dipejalai di baruh agih belanja 2019.

“Ukai semina projek sekula tu taja, projek bukai udah dikemendar baka Opis Pelajar Pelilih Subis, Klinik Sepupok, Balai Bomba Niah ti ditangguh sereta projek tebing sungai dikemendarka ex-Menteri Besai Datuk Seri Najib Razak ti tentu deka dikinsil,” ku iya.

Lukanisman nyemetak madah iya deka nandu randau isu nutup palan pematih pengajar, geran khas Pekara 112D enggau Jadual Ke-10, penanggul dadah enggau projek sekula IBS dikena mutarka penanggul sekula repuk sereta isu rumah pengajar, inisiatif kepenudi dikena nambahka peneras sambung internet menua pesisir, jalai kebun menua pesisir sereta perambu ngempung sekula.

Advertisement