SERIAN: Bala pengajar diperansang seruran ngajar nembiak sida ngena chara pemadu manah dikena nentuka bala nembiak sida diiri enggau penemu ke pemadu tinggi.
Menteri Muda Pemansang Tanah Adat, Datuk Roland Sagah Wee Inn ngaku bala pengajar bejalaika pangku pengawa besai amat ba pengawa nempa orang gawa bisi kualiti, kelebih agi jeman moden diatu.
Ku iya, pengeransing enggau pengepuh bala pengajar gawa nempa raban nembiak bisi kualiti nentuka kuing nengeri enggau menua dudi hari.
“Lalu kita, bala nembiak nembiak, kita deka nyadi penentu dudi hari. Nya kebuah aku ngarapka bala nembiak sekula mega deka ransing belajar, seruran ingatka pekara tu.
“Aku nemu, ba komuniti China, kita seruran beratka pekara pelajar, tang ukai semua nembiak ba Beratok tu bansa China, bisi sekeda ukai China,” ku iya lebuh ngelancharka SJK C Beratok, Jalai Kuching-Serian ditu, kemari.
Sagah, ti mega Kaban Kunsil Nengeri (ADUN) Tarat, ngandalka bala pengajar ba SJK Beratok deka nyaup nyikap rebak nembiak ngena penemu, ti deka nyulut ba pengidup sekalika nyadi pengelicha, nyadi kaban politik, orang dagang tauka nyadi pekereja bukai.
Iya beratika ukai semua orang deka nyadi pengaji, madahka enti genap iku orang nyadi pengaji, nadai orang deka bekereja.
“Mesti ingat, pekereja mega bejalaika pangku pengawa beguna amat ba pengerembai nengeri enggau menua,” ku iya nambah.
Sagah madahka taja ba menua maju, pekereja bejalaika pangku pengawa beguna amat ba pengerembai menua sida.
Ku iya, kea mat, ba sekeda kes, gaji pekereja bukai tinggi agi ari raban profesional ti gawa ba sektor perintah.
“Servis beguna amat. Pekara dikeandalka kitai iya nya kitai bisi pekereja landik ti ulih meri servis pemadu manah ba nengeri enggau menua kitai,” ku iya.