MIRI: Perintah besai dikearap enda bemain enggau hak ‘Oil Mining Ordinance’ (OMO) 1958 kitai ti patut diteritka kuasa dikena meri pemaik ngagai peranak Sarawak.
Chairman PBB Bagi Menua Piasau, Kaunsilor Sardon Zainal madah nadai orang bukai patut ngetuka hak tanah kitai lalu patut nyerah pekara ti nyadi hak Sarawak di baruh MA 1963.
“Kitai bediri tegap di belakang Kepala Menteri (KM) Sarawak, DatukPatinggi Abang Johari Tun Openg lalu enda ibuh berandau enggau perintah besai laban udah terang dipadah ba OMO 1958,” ku Sardon madah ngagai The Borneo Post kemari ngelansa pasal penetap penemu KM.
Nitih ku Sardon, bala kaban PBB ditu nyukung KM Sarawak Datuk Patinggi Abang Johari Tun Openg ke alai Sarawak enda belembut agi pasal hak ngemata aktiviti minyak enggau gis iya.
Abang Johari apin lama ke udah madahka nengeri udah ngubah OMO 1958 iya dikena ngenegapka agi hak ngemata aktiviti minyak enggau gis ba Sarawak.
Ku iya, udah nyadi hak Sarawak lalu deka nadai pengujung isu nya ke alai kuasa patut diterit nitihka undang-undang nengeri kitai.
Ba lansa bukai, iya mejah ulah orang baka Baru Bian enggau Chong sebedau tu mega keran negika isu hak Sarawak tu tang diatu pengudah duduk ba perintah besai semina diau diri aja.
Ku iya, seduai tu diatu diau diri lalu nadai ngemai isu tu ngagai Perintah Besai ungkup hak peranak Sarawak kitai.
Balai Dagang Bumiputera Sarawak (DUBS) Miri nyukung tegut penetap penemu KM Datuk Patinggi Abang Johari senentang hak Sarawak ba aktiviti minyak enggau gis sereta ubah dikena ngenegapka OMO.
“Kitai patut neritka kuasa hak ba minyak enggau gis sereta OMO naka diatu,” ku Chairman DUBS Miri, Abdul Samat Ali.
Nitih ku Samat, kitai semina ngandal enggau ngarapka Menteri Besai sereta kesemua Kabinet Pakatan Harapan deka ngamatka semaya sida meri pulai hak Sarawak baka disempekat di baruh MA63 enggau Konstituasyen Perintah Besai enggau naka penyampat.
Udah kelalau lama enggau peranak Sarawak dekaka hak sida pulai baru ngambika nengeri tu ulih terus ngerembai begulai enggau nengeri bukai, ku iya.
Taja pia, Samat nyemetak madahka DUBS Miri bisi enda entu arapka pengelurus Perintah Besai enggau chara sida enda beratka pekara ti dipinta kitai.
Ba renggat baruh, kitai bisi ninga berita ti madahka nadai entu randau nyenggala antara kededua raban lalu kitai ngasaika bisi pematut ngansak pekara tu, enti enda sida deka berasai lantang nitihka timpuh sida empu. Lalu kitai dekaka hak entara kandang tasik dipebasa sereta dipulaika baru baka sebedau MA63, ku iya nandu.
Ba lansa bukai, iya madahka DUBS Miri mega meri sukung tegut ba pengawa KM deka ngemansangka ekonomi digital.
Kitai ngarapka Perintah nengeri deka beratika mayuh agi projek berumah ulih dibeli sereta ulih ditangkup raban kurang enggau jelan iya penatai pemisi, kelebih agi ba pasar enggau mengeri besai ba Sarawak. Lalu kitai patut beratika pekara ngemunaska penyeranta ba Sarawak enggau jampat, sebedau taun 2030, ku iya.