KUCHING: Mengeri Kuching deka nyadi hub ungkup penerebai bilun tambang murah, Air Asia ti deka nyambung Bangkok enggau Jakarta.
Kepala Menteri,Datuk Patinggi Abang Johari Tun Openg madah perambu nya diatu benung dikerandau enggau Air Asia.
“Pengudah dikemujur, pekara tu meri pengelantang ngagai temuai ukai semina ngelawa Kuching, tang mega ngelawa mengeri bukai di Sarawak.
“Juluk tu ulih dijapai laban kitai bisi mayuh palan pematak temuai enggau eko dagang temuai bepelasarka main asal sereta rampa menua,’ku iya.
Iya mansutka jaku nya rambau ngulu pengawa bejadi ‘Air Pancutan Berirama Darul Hana’ ke dikemujur Tuai Megai Menua(TYT), Tun Pehin Sri Abdul Taib Mahmud nyerumba pengerami ngintu Hari Pengada iya ke-82 di Waterfront Kuching ditu, malam ensanus.
Berindik enggau nya, Abang Johari madah perintah negeri deka majakka pengawa ngemanah pekara ke bekait enggau palan pematak temuai di mengeri tu.
Entara sekeda iya nya ngaga ‘air terjun’ enggau ‘Tea House’ besemak enggau Kubu Magherita, nyengkaum ngemanah Brooke Dockyard ke disambung ngagai Waterfront Kuching sereta genturung pendiau bansa Melayu di mengeri tu.
Kelimpah ari nya, perintah mega keran numbuhka mengeri pesaka ngambi ulih mandangka sejarah ke nyadi di Mengeri Kuching.
Diatu ku Abang Johari, perintah negeri benung ngaga ‘Masjid Terapung’ di Waterfront Kuching, ke disadang nyadi siti agi pematak temuai nyengkaum Kampus Muzium Sarawak.
“Tu mih chara ‘out of the box’ kitai dikena ngangkatka Kuching nyadi siti mengeri ke pemadu manah lalu nyadi palan palan pematak temuai.
“Tang semua tu nagih penyerakup ke tegap entara kitai ba atur ngangkatka ekonomi negeri, iya nya ba pekara servis enggau dagang temuai,”ku iya.
‘Air Pancut Berirama Darul Hana’, ke digaga ba mua begunan Dewan Kunsil Negeri (DUN) nyadi ikon dagang temuai baru di mengeri tu.
Digaga asil buah runding Abang Johari, operasyen ai nya nguna teknologi baru ke ngembuan jelatung pemesai 100 meter.
Diatas jelatung nya dipasang beratus ‘nozzle’ ti ditusun enggau manah lalu ulih mansutka ai sepeninggi 25 meter ari Sungai Sarawak.
Dipasang dua sesi tetiap malam urung timpuh 15 minit, iya nya berengkah jam 8.30 enggau 10.30, ‘Air Pancut Berirama Darul Hana’ chukup unik.
Bela bisi datai bini Taib, Toh Puah Ragad Kurdi Taib, Sapit Kepala Menteri, Datuk Amar Awang Tengah Ali Hasan, Speaker DUN, Datuk Amar Mohamad Asfia Awang Nassar, Menteri Dagang Temuai, Seni, main Asal, Nembiak enggau Lumba, Datuk Abdul Karim Rahman Hamzah enggau Sekretari Perintah Negeri Tan Sri Datuk Amar Mohamad Morshidi Abdul Ghani.