Anda di sini

‘Waterfront Musical Fountain’ deka nyadi pematak baru Mengeri Besai Kuching

 Rampa menua melakangka Kompleks Dewan Undangan Negeri Sarawak ti manah dipeda maya malam hari ari pemisi ‘musical fountain’ berengkah ari Hari Minggu tu. — Gambar pemeri FB Sarawak Edition
IKON BARU: Rampa menua melakangka Kompleks Dewan Undangan Negeri Sarawak ti manah dipeda maya malam hari ari pemisi ‘musical fountain’ berengkah ari Hari Minggu tu. — Gambar pemeri FB Sarawak Edition

KUCHING: Kuching ‘Waterfront Musical Fountain’ deka nyadi pematak baru Mengeri Besai Kuching pengudah dipenyadi kena malam Hari Minggu nyin tadi.

Ba tebing Sungai Sarawak, betunga mua enggau Kompleks Dewan Kunsil Nengeri Sarawak sereta besemak enggau Astana.

Datuk Bandar Kuching Utara Datuk Abang Abdul Wahap Abang Julai madahka tu deka mantaika tiga pekara ai, muzik enggau panchar api.

Tentu deka matak bala pengusung ngagai Tebing Sungai Kuching, seberai Kompleks Dewan Kunsil Nengeri Sarawak.

“Pengawa mandangka ‘musical fountain’ tu deka diatur tetiap malam, meri pemanah rampa menua mengeri,” ku iya lebuh dikerandau Utusan Borneo kemari.

Nya deka dipandang dua kali tetiap malam urung pukul 7.30 enggau 8.30 malam.

Tetiap sesi deka begunaka timpuh pengelama 15 minit.

“Engka malam Hari Minggu kitai deka nambah ngagai tiga sesi enggau tambah urung pukul 9.30 malam,” ku iya.

Besepiak enggau Jematan Darul Hana, dipelaba deka dipenyadika Tuai Megai Menua (TYT), Tun Pehin Sri Abdul Taib Mahmud.

Tu projek dipejalai ari baruh Dewan Bandaraya Kuching Utara (DBKU).

Pengawa bejadi deka diatur beserimbai enggau pengerami ngintu Hari Pengada ke-82 TYT Sarawak.

Berindik ari nya, Jematan Darul Hana deka ditutup enda lama berengkah ari pukul 3 lemai kena 14 Oktober nyentuk pukul 6 pagi, 15 Oktober dikena nyendiaka diri enggau ketegal pekara pengelikun.

Mensia mayuh ditesau sampal datai ngerichahka agi pengerami ba Tebing Sungai Kuching berengkah ari pukul 7.00 malam.