KUCHING: Perintah nengeri beterima kasih ngagai perambu perintah besai ke deka ngubah Pekara 1(2) Konstitusyen Perintah Besai enggau tuju ngemanahka penuduk Sarawak.
Kepala Menteri Datuk Patinggi Abang Johari Tun Openg madah, taja pia ubah nya patut dipeda sereta mungkur semua pekara.
“Aku beterima kasih ngagai perambu ti deka ngubah Konstitusyen nya dikena meri pemaik ngagai penuduk Sarawak.
“Tang aku berunding tauka bepenemu manah agi ba kitai deka meda enggau holistik laban bisi mega siti Pekara di dalam Konstitusyen112D, ke patut ditegapka agi,” ku iya.
Abang Johari mansutka pekara nya kemari, lebuh dipinta meri penerang bekaul enggau perambu ubah Pekara 1(2) Konstitusyen Perintah Besai ti dibantaika Menteri ba Opis Menteri Besai (Undang-Undang) Datuk Liew Vui Keong apin lama.
Dulu ari nya iya bejadika Borneo Water &Wastewater Exhibition & Conference (BWWEC) 2018 ti diatur Perintah Sarawak, Opis Menteri Utiliti enggau Gerempung Ai Malaysia ba sebuah hotel ditu.
Bekaul enggau perambu ubah nya, sebengkah komiti ti sebaka enggau komiti entara perintah (IGC) patut ditumbuh awakka ulih mansik semua aspek dalam Konstitusyen Perintah Besai kelimpah ari Sempekat Malaysia 1963.
Ku Abang Johari, diatu endang udah bisi komiti ngemataka pekara nya tang patut dikerembaika.
“Kitai bisi komiti mansik pekara nya, tang aku udah madahka penemu kitai iya nya komiti tu patut dikerembaika, ukai komiti kabinet.
“Iya meseti sebaka enggai komiti entara perintah (IGC) ti mansik semua pekara dalam Konstitusyen kitai kelimpah ari Sempekat Malaysia.
“Nya (komiti) ulih nyengkaum Kaban Kunsil Nengeri enggau Kaban Parlimen, ngambika sida ulih begulai enggau pangan diri lalu ulih mansik. Sama enggau model IGC,” ku iya.
Liew ba sebengkah pengerami ditu apin lama madahka deka merambu ngubah Pekara 1(2) Konstitusyen Perintah Besai dikena ngemanahka status Sabah enggau Sarawak baka sebedau ubah digaga ba taun 1976.
Terang iya, perambu ubah nya deka dikenataika ngagai kabinet dulu sebedau dipejuraika ba Parlimen ba aum ti ditimpuhka berengkah 15 Oktober tu.
“Enggau jaku bukai, Sabah enggau Sarawak deka bulih status sida ba ke ditulis di baruh Pekara 4, MA63.
“Nama ke dikearapka aku iya nya kitai semua, rayat Malaysia terus beserakup sereta beserakup ati dalam ngubah Artikel 1(2) sereta ngemetulka penyiping ti diasaika Sabah enggau Sarawak pengelama tiga dekad ke udah,” ku Liew apin lama ditu.