MIRI: Opis Menteri Betanam Betupi Moden, Tanah Adat enggau Pemansang Kandang Menua (MANRED) deka ngaul dua kompeni besai bepelasarka pengawa betanam betupi di Miri dikena ngerembaika pemansang industri pisang enggau chabi ditu.
Menteri Muda Betanam Betupi, Dr Abdul Rahman Ismail madahka tu pengawa dikena meransang kaul agresif agi belalauka asil betanam ba nengeri tu, enggau sarikat besai ti ngetuaika industri tu sereta mantu pekebun mit.
“Kitai dekaka bala pekebun, kelebih agi raban nembiak, ulih tama ngagai arus kompeni besai sereta maju begulai,” ku iya madah ngagai The Borneo Post di Miri apin lama udah.
Menteri mudah nguluka raban nya ngabas ladang kompeni nanam pisang Cavenish ngena kultur tisu ba Tukau enggau sebuah dandang chabi skala dagang besai besepiak enggau baris rumah banglo berega bejuta ringgit di Pulau Melayu.
Raban nya datai ari Menteri Muda Orang Indu, Ruang Bilik enggau Pemansang Anak Mit enggau ADUN Bekenu, Rosey Yunus, ADUN Lambir Ripin Lamat, pemesai ari opis menteri sereta opis di Limbang enggau Miri sereta bala pekebun ti bisi ati datai ari Limbang enggau Miri.
Dr Rahman madahka opis menteri ba pengawa nambahka pengawa betanam betupi moden enggau mantu pekebun mit nyingkang mansang ari kaul ba pemansut, penau, peneleba enggau akses makit kompeni besai dikena ngemanahka produktiviti enggau nambahka penatai pemisi.
“Kitai udah nyain MoU enggau kompeni besai ungkup rian, lalu enda lama agi, nanas, pisang (di Kuching) enggau udang, lalu opis menteri ngining MoU ke sama deka disain ungkup kompeni besai chabi enggau pisang di Miri ila,” ku iya.
Iya temagah ati mega laban pemansang di Miri, nyengkaum makmal kultur tisu ngambika milih kereban nanam pisang Cavendish ke pemadu manah enggau ‘ripening facilities’ ari kompeni Botanium group ti ulih nanam urung 200 ekar baka pansut ari plot eksperimen ti nyendiaka rengka mata.
Direktor ngatur pengawa, T.K.Jong madahka teknologi moden enggau kualiti kereban nanam datai ari Taiwan pun suba, lalu makmal ba Miri diatu ulih ngasilka kereban nanam kediri empu ari tisu.
“Kelimpah ari nangkup peminta makit menua tu, kitai deka ngiru standard pengelikun pemakai antarabansa ngambika dieksport ngagai Jepun enggau makit bukai ila,” ku iya nerang.
Jong madahka kereban nanam bisi kualiti iya nya ‘pra-syarat’ ba buah ti bisi kualiti tinggi enggau asil tinggi ti dijapai enggau teknologi enggau penau dalam bidang nya.
Raban sida mega bisi ngabas ladang Grasicili di Pulau Melayu ti udah berengkah gawa nyauka empat bulan ke udah sereta udah mansutka asil nangkup peminta makit diatu.
Pengempu nya, Munir Ashim Abdullah madahka 4.5 ekar ari tanah bisi ditanam 12,000 pun, enggau 9,000 agi deka ditanam.
“Kompeni di Miri ti nerima bekal ari Sabah diatu meli ari kitai laban agi baru,” ku iya seraya madahka peminta ari menua tu ngelui ari bekal ke chukup.
Kompeni diatu bisi 528 pekebun di baruh sayap sida ti nyadi kaban ba pengawa mansutka chabi serata nengeri.
Ladang di Pulau Melayu iya nya tanah puang besepiak enggau banglo ke berega bejuta ringgit sereta dikereja lima iku staf tetap lalu ditambah enggau sida ti gawa ngetau chara nyambil.
