KUCHING: Kaban Parlimen (MP) Julau, Larry Sng mejah Chairman PKR Sarawak, Baru Bian enggau bala penyukung iya ti nguji nginsil pekara ti udah diripot baka ‘astronomical rise’ ari kaban parti ba pampang Julau.
Larry, ngirai diri empu nyadi chalun nyadi chairman PKR Julau,madahka Baru enggau bala penyukung iya patut anang masau jam enggau pengawa sida deka nginsil nyadi kaban parti ba Julau.
“Tang sida patut netapka pemerat diri mutarka isu rayat enggau penanggul ba pekara baka makai suap ti udah nyadi endemik ba Sarawak,” ku Larry ba Facebook iya ke pemadu baru.
Larry beratika udah manggai lima bulan kenyau ari Pengawa Bepilih Besai Ke-14 (PRU14) lalu nadai sebarang pengawa udah dipejalaika Komiti Nagang Pengawa Makai Suap Malaysia (SPRM) Sarawak pia mega bala ketuai PKR Sarawak PKR ba pengawa mutarka penyalah makai suap.
“Sekretari politik Baru empu udah dituduh apin lama ke udah meli undi ungkup projek. Taja pia, nadai sebarang atur udah dipejalaika Baru Bian.
“Enti sema bala ketuai PKR ba Sarawak ke diatu seruran baka tu, kitai nadai bida ari BN lalu kitai deka lenyau sukung enggau pengarap ati dalam timpuh pandak.
“Maya ke nempa kitai bulih pemujur nadai agi, kitai meseti ngamatka semaya enggau negika pengawa ungkup rayat,” ku Larry.
“Bisi dikeluar apin lama ke udah ba Borneo Post pasal ‘astronomical rise’ penyampau tubuh kaban PKR Julau, ari ti diripot 603 iku dalam bulan Jun taun tu manggai 13,000 iku ngenyit sehari udah nya.
Larry madahka dalam ripot nya engka mayuh rayat diatu ngasaika sida ulih terang mantaika sukung diri lalu nyadika kaban parti berindik ari ubah ba perintah besai.
Larry mega ngining siti ari penuduk Palan Kaunsil Ketuai (MPP) dalam parti nya.
Kena 2 September, iya ngatur program ‘#Reformasi20Tahun’ di Kuching ba pengawa nyukung Rafizi Ramli bediri minta pilih ba pangku pengawa sapit presiden PKR.
Larry nyereta PKR enda lama pengudah menang ba penuduk Julau maya PRU14 dalam bulan Mei.