KUCHING: Ketuai Pakatan Harapan (PH) Sarawak, Chong Chieng Jen agi enda lantang ati enggau penerang diberi Sapit Kepala Menteri Tan Sri Dr James Masing senentang tanya iya bekaul enggau Ejensi Pemansang Ulu Rajang (URDA).
Chong ti mega Chairman DAP Nengeri madahka iya deka minta ampun ngagai Masing nyema iya salah betanya, ti udah disangkal Masing madahka iya semina bejaku selebubu ngapa.
Timbal Masing dalam portal berita baka ti ngelanggur semina sekeda firma injinir aja ti patut ngaga jalai enggau projek bekal ai dalam kandang menua URDA lebuh bisi lebih ari 50 sida ti bisi di Sarawak chakah gawa dalam projek perintah, ku Chong kemari, lebuh malas timbal ari Masing dalam portal berita nya.
“Taja pengawa nyiri bedau diaku ari Sekretari Wang Nengeri, tang nitihka penerang ari dalam aku, madahka URDA ke ari baruh nama James Masing udah nganjung keretas kereja ngagai Opis Wang Nengeri ngambika semina nyiri tiga konsultan ungkup projek jalai lalu siti konsultan ungkup projek bekal ai. Sekalika James Masing deka ngenukuka penerang ke baka tu?” ku iya nanya.
“Ku Masing, keretas perambu URDA udah diputuska. Udah nyadi prosedur, pengudah sebarang ejensi perintah nengeri ngaga pemutuska ba keretas kereja, nya patut minta pemendar kepenudi ari opis wang nengeri,” ku Chong. “Nya alai aku nyakap James Masing ngambi mantaika keretas kereja ti dianjung URDA ngagai Opis Wang Nengeri. Enti aku salah ba penerang berita aku, aku deka minta ampun ngagai James Masing. Taja pia, enti aku betul, James Masing patut meri penerang ukai semina ngagai peranak Sarawak, tang mega ngagai MACC,” ku iya.
Masing ti mega chairman URDA madah, portal berita ke alai iya ngenadaika sebarang pekara dituku tauka nyiri semina tiga konsultan aja dipadu mai pemansang jalai enggau bekal ai ngagai kandang menua Ulu Rajang, baka ti dituduh Chong.
Nimbal pekara ti dituduh Chong ke alai URDA bisi kaul enggau kronisme, Masing ti nyadi Menteri Pemansang Infrastruktur enggau Perengka Pengangkut, ngumbai Chong orang ti “nadai pematut, bejaku selebubu enggau nadai tanggungpengawa”.
Ku iya, taja semua orang bisi hak meri penemu, opis menteri iya ngelaluka penemu ti manah.
“Taja pan iya (Chong) mansutka jaku selebu sereta meragam ngapa, iya enda berasai kakang meri peragam pelesu ngagai mensia mayuh ngena penerang ke negatif baka bisi kaul enggau kronisme. Formula iya mudah. Bejaku pasal nama pengawa ti enda dikereja URDA, ngaga baka kitai ngereja nya lalu ngamahka nama kitai,” ku Masing ti mega ADUN Baleh.
Masing nyemetak madah taja bisi mayuh konsultan ba Sarawak, pemadu beguna URDA milih semina sida ti nyata bisi rikod pengawa ti manah laban tebal agi projek ba kandang menua pesisir, nya kebuah, konsultan meseti nemu atur nya, peminta komuniti enggau gaya idup peranak ngambika perambu projek praktikal.
Bala konsultan meseti dulu agi bisi peneleba ba pengawa merambu, matau enggau bejalaika projek ba kandang menua pesisir lalu sida ti bisi peneleba ba mengeri engka enda engkeman ba menua pesisir, ku iya nambah.
Engka sida tu bisi pelajar tang sida engka enda praktikal mutarka gaya menua pesisir sereta engka sida deka puntan, ku Masing madah nyemetak.
URDA dikena mai pemansang jalai enggai ai ngagai sitak Ngemah, Machan, Pelagus, Katibas, Bukit Goram, Baleh, Belaga enggau Murum.
Ku Chong: “Semua penyampau projek mungkur 20 pakej ari projek ngaga jalai enggau semua anggar belanja urung RM1,181 juta; siti pakej projek jematan enggau anggar belanja RM14 juta; sereta 15 pakej projek bekal ai enggau anggar belanja sepenyampau RM277 juta.
“Taja mayuh penanggul ba projek, aku dipadahka tuju URDA semina deka nyiri tiga konsultan ti gawa ngaga jalai enggau projek jematan, lalu siti konsultan ungkup projek bekal ai,” ku iya ba penerang berita ti dikeluar kena Hari Minggu tu tadi.