KAPIT: Kaban Kunsil Nengeri (ADUN) Bukit Goram Jefferson Jamit Unyat bisi nimbal penemu Ketuai Pemesai Eksekutif (CEO) Syarikat Telecom Malaysia Bhd Wilayah Sarawak, Zakinal Tuah senentang penanggul tejanggal enggau nadai sambung servis arus penyambung – telefon binching sereta internet ti suah nyadi, apin lama ke udah.
Zakinal bisi ngabas kia ngulu pengawa meri penerang Ejensi Pemansang Ulu Rajang (URDA) ti diatur ba Palan Sivik Kapit madahka diri sedarka penanggul nya lalu ejensi naka ulih gawa ngemanah enggau ngangkatmanahka servis nya.
Empat isu besai ti diperatika peranak ditu iya nya servis arus penyambung suah tejanggal, stesyen minyak suah napi penanggul suntuk bekal minyak, penanggul enda chukup paking entukar ba Pasar Kapit sereta penanggul tejanggal bekal ai beresi enggau bekal kuasa karan.
Perintah sedarka penanggul tu lalu projek URDA meri fokus ngagai pemansang penyikap perengka guna pemun enggau infrastruktur dikena mutarka penanggul nya. Fokus udah diberi ngagai bekal ai paip beresi ngambika ngaga baru Palan Meresi Ai lalu nukar batang paip lama dikena ngurangka bekal ai pantis nentuka bekal ai seruran chukup ungkup peranak di kandang menua nya.
Jalai (pengangkut darat) enggau Bekal Kuasa Karan Menua Pesisir (RES) dikemerat. Kesemua projek tu beungkus RM1.472 biliun dipejalai di baruh URDA ti mungkur Kandang Menua Kanowit enggau Kapit, dipelaba deka ngubah rampa menua. Semua projek udah dikemendar dipejalai dalam taun 2019 enggau 2020.