Anda di sini

Rayat menua pesisir patut nemu ngena perengka ICT

Advertisement
 Sekeda ari pesereta ke ngulu Program Pejalai Komuniti Palan Internet Pasar Jakar di Rumah Unding, ensana.
PENEMU BARU: Sekeda ari pesereta ke ngulu Program Pejalai Komuniti Palan Internet Pasar Jakar di Rumah Unding, ensana.

SARIKEI: Rayat ke diau ba menua pesisir patut lebih nemu bekaul enggau perengka guna internet ke maya hari tu ke majak ngerembai lalu mayuh mantu pengawa ke dikereja ninting hari.

Chairman Palan Internet Pasar Jakar, Kaunselor Setia Unggok madah, pemansang dunya ke mayuh bepanggai ngagai perengka guna teknologi pemadah enggau penyambung (ICT) endang enda ulih disangkal agi ngemuntangka mayuh pengawa.

“Beduduk ari nya, kitai deka rayat ba menua pesisir nambahka penemu sida ngenuna ICT abis nadai nemu mimit.

“Pengawa tu beguna amat dikena nentuka kitai enda tinggal ari arus pemansang moden enggau jeman ICT ke majak ngerembai.

“Nengah perengka ICT ke udah dikerembai ba kandang menua pesisir, sida patut berunding ari pekara nya dikena nentuka sida ngasaika pangka ke manah ari pemansang ICT,” ku Setia.

Iya madah munyi nya rambau Program Pejalai Komuniti Palan Internet Pasar Jakar di Rumah Unding, Sungai Petai, Jalan Kerubong, ditu,kemari.

Program tu diatur Palan Internet Pasar Jakar lalu udah digulu urung 100 iku peranak ke besemak.

Ba program tu mega, Setia bisi meri penerang bekaul perengka guna ke bisi ba Palan Internet Pasar Jakar.

“Ba palan Internet Pasar Jakar bisi mayuh perengka guna ke disedia baka perengka komputer enggau bantu chara nguna perengka ICT.

“Nya alai, kitai endang meransang mensia mayuh minta nyadi kaban Palan Internet Pasar Jakar tu laban mayuh perengka ke ulih diguna sida nyema sida udah nyadi kaban palan nya.

Kitai ba Palan Internet Pasar Jakar bisi juluk iya nya deka ngelatih enggau nambahka penemu komuniti ke deka nyingkang maju, lebih agi dikena ngedut baru takah digital enggau mensia mayuh di menua pesisir enggau kandang mengeri,” ku tandu Setia.

Advertisement