SIBU: Opis Menteri Dagang Temuai dikeandal chakah agi ngangkatka mengeri Sibu nyadi sebengkah menua ke manah alai temuai nemuai.
Chairman Gerempung Hotel Sarawak Sitak Tengah, Johnny Wong Sie Lee madah, nyentuk ke diatu mengeri tu mengkang nerima kurang penatai temuai ari menua bukai.
“Kitai enda nemu sida ke bekaul baik ke sida kurang merati (dagang temuai) Sibu tauka enda.
“Tang kitai andal mengeri Sibu ulih digaga mayuh agi palan ke manah ti tau matak penatai temuai kitu,” pia ku iya maya Pengerami Makai Lemai gerempung sida ba sebuah hotel ditu, lemai ensana.
Nambahka jaku iya, Johnny mega madah, penerebai bilun terus ke Sibu besai reti ba pekara nyungkakka dagang temuai di mengeri tu.
Ku iya, ambika chunto baka nambahka servis penerebai bilun ari Kota Kinabalu ke Sibu.
“Ba aku, servis penerabai bilun tu bela tau dibuka ngagai kompeni bilun ke bukai iya ke diatu semina bisi Maswing aja.
“Enti bisi ila dia temuai ke nemuai ngagai Sabah tau terus ngena bilun ke Sibu kitu.
“Di Sabah mayuh temuai datai lebih agi temuai ari Jipun, Korea tauka Taiwan ketegal rampa menua sida manah,” ku iya madah baru.
Johnny madah, ba Sibu bisi pengelebih ti nadai ba menua bukai ke patut diangkatka manah agi.
“Berindik ari nya, kitai ngarapka Opis Menteri Dagang Temuai beratika pekara ti ulih ngangkatka dagang temuai di Sibu,” pia ku iya ti udah dipilih baru nyadi chairman gerempung sida renggat 2018-2019.
Ba pekara bekaul, iya bela muji pengawa Opis Kaunsil Sibu (SMC) ti udah ransing ngemanahka mengeri tu nyengkaum ngatur baru pejalai kereta ba kandang mengeri.
Iya madah, sekeda jalai di Sibu patut diubah baru ketegal ti enda engkeman dikena agi bepun ari penyampau kerita majak mayuh.
“Ba tuju kitai bela nyungkak dagang temuai ditu, SMC patut berati enggau silik beberapa bengkah pekara nyengkaum pejalai kerita.
“Ukai semina nya, lurung jalai kaki tau direrak ngambika ulih digagaka palan paking kerita iya ke diatu majak enda chukup dikena,” ku iya nerang.
Awak tu mega dikena Johnny mai raban gerempung sida mengkang meri kerejasama ke manah ngagai raban polis enggau Bomba.
Sapit Ketuai Polis Sibu Supt Martin Koo ti nyadi temuai ke dipebasa maya pengerami tu madahka kerejasama orang ke beempu hotel besai reti ngagai sida ba pengawa ngemunaska penyalah ba sitak tu.
Iya madah, ke diatu orang ke beempu hotel nadai penanggul meri kerejasama ngagai sida maya ngatur pengawa ngabas ngenyit ba hotel.
“Taja pia, kitai mega randaka orang beempu hotel anang laun tauka anang enggai madah ngagai polis nyema bisi nemu orang ke nyiwa ngereja penyalah ba hotel sida,” pia ku iya madah.