SIBU: Raban indai tunggal ditangkan anang enda ngibuhkapekara pelajar bala anak sida betapi enggau mayuh penanggul pengidup.
Kaban Kunsil Nengeri (ADUN) Dudong Datuk Tiong Thai King madah, laban semina nengah pelajar aja ulih ngubah pengidup sida dudi hari.
“Taja tusah baka nipan pengidup kita, anang sesekalika enda ngibuhka pekara pelajar anak.
“Gaga nya nyadi pekara lumur satu, enda ngawa kita tusah dulu tang senang dudi hari,” ku iya bejaku ba pengerami bejadika Festival Kuih Bulan 2018 diatur Indu Parti Rakyat Bersatu (UPP) Pampang Dudong ditu lemai ensana.
Sama datai Ketuai Indu UPP Pampang Dudong Kapitan Connie Loh sereta temuai ke bukai.
Pengerami nya digulu urung 170 indai tunggal begulai enggau bala anak sida.
Tiong ke mega Chairman Kaunsil Mengeri Sibu (MPS) meransang raban nya seruran liat ati sereta puh napi pemar pengidup.
“Anang jampat tepantup ati, teruska pengawa kita nupi anak enggau manah.
“Bala anak nya reta ke chukup berega ngagai kita laban sida deka nyaga kita maya udah besai ila,” ku iya.
Iya madah, raban nya seruran diperatika perintah lalu mayuh bantu disedia ungkup sida.
“Anang takut laban kita disediaka mayuh macham bantu dikena neruska pengidup nyengkaum ba sukut pelajar ungkup bala anak.
“Diatu mayuh indai tunggal udah mujur dalam pengidup lebih agi ba bidang ekonomi sereta dagang ke dipasuk nyentuk bisi sida tu chukup dikemegah sereta dipebasa,” ku iya.
Dulu ari nya, Loh ba jaku iya madah Festival Kuih Bulan endang panggau ungkup raban bansa China ngelala enggau silik pasal main asal enggau pesaka asal sida.
Kenu ku iya, pengerami nya mega ulih dikena ngerapitka kaul diri sebilik enggau orang bukai.
“Kemeranka ba ulah diri adat aat enggau pesaka asal kitai ngambika terus dijaga sampaika jemah ila.
“Gaga iya nyadi chara dikena kitai ngedut kaul sereta nempa pengelantang ukai semina entara kitai tang mega enggau bansa bukai,” ku iya.
Pengudah pengerami, Tiong diuluka Loh nyuaka pemeri ngagai raban indai tunggal ke bisi datai.