LIMBANG: Hari Bukit Mas diatu masuk renggat ke-14, siti agi pengerami besai ke ulih matai penatai temuai ari luar ti deka dipasuk nyadi sebengkah ari program dalam Kalendar Dagang Temuai Nengeri bepun taun ti deka datai.
Ketuai Opis Kaunsil Pelilih Limbang (MDL) Kaunselor Sufian Mohat madah, Kaunsil Pemansang Kandang Menua Utara (NRDA) ditumbuh nengah Kaunsil Pemansang Korior Kandang Menua (RECODA) udah ngelala Hari Bukit Mas nyadi sebengkah ari program dagang temuai ke chukup manah adap ke utara menua tu.
Nya alai, Komiti Dagang Temuai, Rama, Nembiak enggau Main Asal betuaika ADUN Batu Danau
Paulus Palu Gumbang setuju ngerintaika program nya dipasuk dalam Kalendar Dagang Temuai Nengeri kelimpah Program Pesta Lumpur Bebuak.
“Dikena nyikap diri ngatur Hari Bukit Mas ninting taun, urung RM300, 000 agih belanja dikena ngemanahka perengka guna ba Taman Tasik Bukit Mas ke endang nyadi palan besai endur ngatur tu,”ku iya rambau aum pemberita ba Opis MDL kemari.
Sufian madah, piak sida udah nyendiaka langgur pemansang dikena ngaga Taman Tasik Bukit Mas nyadi sebengkah produk dagang temuai ke pemadu manah ba pelilih tu.
“Kami merambu deka ngaga Taman Tasik Bukit Mas baka palan main asal ke mungkur lapan suku bansa baka ti digaga ba Santubong Kuching.
“Urung RM5 juta diguna dikena ngaga begunan main asal ke mungkur lapan bansa ba sitak tu dudi hari,” ku iya.
Iya mega andal Hari Bukit Mas ti diatur ninting taun deka nyungkak penatai pemisi rayat Limbang.
“Ba program tu mega, rayat Limbang ulih ngangkatka penatai pemisi diri nengah pengawa bejual pemakai, ai irup enggau produk ke disediaka piak kami.
“Berebak enggau nya, peranak menua tu enggau luar lebih agi ari menua Brunei deka ulih begulai matak temuai ari luar,” ku iya.
Kenu ku iya mega, MDL deka ngatur kerjasama enggau Menua Brunei, Sabah sereta Labuan ngemujurka pengerami Hari Bukit Mas taun baru dikena ngelakuka pengerami nya ba renggat Borneo.
“Ba pekit Mr Body Builder enggau Mr Wonderful iya nya entara pekit ke dikerindu mensia mayuh, urung 70 peratus pesereta endang datai ari menua Brunei Darussalam, kelimpah ari Sarawak, Labuan, Sabah enggau Semenanjung Malaysia “ku iya.
“Kelimpah nya, bisi 20 aktiviti disedia dikena ngerichah pengerami serak tu nyengkaum aktiviti baru baka pekit batak tali ngena kain, pekit kerita, motorsikal enggau ensikal berias, pekit main asal, pekit ambuyat, petanque enggau mayuh agi aktiviti bukai ke diatur berengkah 5 nyentuk 7 Oktober tu ila.
“Pekit kepenudi iya nya diatur muak ke malam 6 Oktober (Hari Enam) iya nya Malam Main Asal nyerumba Hari Bukit Mas 2018 dipelaba deka dipenyadika Sapit Kepala Menteri Datuk Amar Awang Tengah Ali Hasan,”ku iya.
Taman Tasik Bukit Mas ku iya palan tebilang ke deka dilakuka ngagai mensia mayuh kelimpah ari Lumpur Bebuak, Jeti Kampung Patiambun ke benung dikemanah MDL.