SIBU: Urung 800 pengawa terejun udah udah dipejalaika sekumbang empat hari ba 10th Sibu International BASE Jump 2018 berengkah ari 20 nyentuk 23 Sept, ti mantaika 34 penerejun ari 14 menua.
Sida tu datai ari US, the UK, Belarus, Belgium, Canada, Estonia, Ireland, New Zealand, Russia, Finland, France, Germany, Australia enggau Malaysia.
Greg McEntee ari Ireland nyadi penerejun ke pemadu suah terejun, iya nya 48 kali, pia ku Residen Sibu Charles Siaw.
Nyemayaka pengerami ke besai agi taun baru, Residen nya madahka nya enda nyengkaum perambu pekit ti bepelasarka penyampau terejun ke pemadu suah.
“Ketegal pekara pengelikun, pekit ke baka nya enda diperansang. Kami meseti ngenuluka pekara pengelikun,” ku iya.
Mayuh bengkah aktiviti bukai mega dipejalaika nyerumba pengerami nya taun tu, baka Pekit Lelaki Kering Kenyalang, nerebaika gudi enggau program ngiri penemu pasal penyakit rabies, ‘walk-a-mile’, bejalai malam enggau ‘sukan rakyat’ kelimpah karnival ti dipejalaika pengelama 12 hari berengkah ari 12 Sept nyentuk 23 dikena ngelaika penumbuh ke-10 Sibu International BASE Jump.