Anda di sini

MAHB udah bejadi padang bilun STOL Bario ti udah dikemanah

 Raja Azmi (tengah) ngempat riben kelai pengawa bejadi padang bilun STOL Bario ke udah diangkatmanah seraya dikemata Aminuddin (dua kiba) enggau pengari MAFB ke bukai.
BEJADI: Raja Azmi (tengah) ngempat riben kelai pengawa bejadi padang bilun STOL Bario ke udah diangkatmanah seraya dikemata Aminuddin (dua kiba) enggau pengari MAFB ke bukai.

MIRI: Malaysia Airports Holding BHD (MAHB) udah ngemunka padang bilun ‘Landasan Berlepas dan Pendaratan Pendek’ (STOLport) di Bario, ti baru udah dikemanah bedau lama.

Pengawa bejadika begunan terminal STOLport Bario ke baru nya udah digaga Ketuai Pemesai Eksekutif MAHB Raja Azmi Raja Nazuddin ke lalu bisi madahka STOLport udah lama bejalaika operasyen pengelama 22 taun kenyau ari taun 1996.

“Mayuh ti udah dijapai enggau STOLport tu kelebih agi ungkup peranak di kandang menua tu.

“Ungkup pekara bukai ti ukai semina nyadi penyambung ke peranak di kandang menua tu sereta orang luar ke menua pesisir, STOLport mega siti ari chara Malaysia Airports meri pemaik ngagai komuniti nengah program tanggungpengawa rama korporat (CSR) kami,” ku iya lebuh ti bejaku bejadika pengerami ngemun STOLport Bario kemari.

Raja Azmi udah madahka entara perengkaguna ke diangkatmanah di begunan terminal STOLport iya nya nyengkaum palan endur kanti ke lantang ungkup orang tambang, palan endur ngengkahka entukar sereta motosikal ke baru lalu ngangkatmanah struktur ba dalam enggau luar begunana nya.

“Nengah penyuah penerebai ke Bario sepengudah projek ngemanah padang bilun tu, aku pechaya sektor eko-dagang temuai ba palan tanah tinggi deka majak ngerembai.
“Pia mega, tikas pemisi ekonomi pan deka nambah lalu tu udah tentu deka mantu ngadaka mayuh agi peluang kereja sereta ekonomi ungkup peranak di kandang tanah tinggi Bario,” ku iya nambah.

Raja Azmi mega madah nengah STOLport Bario ke baru nya ulih nyungkak pemayuh bilun ti ulih singgah ari 21 buah sebedau tu, ngagai 28 buah bilun seminggu.

“Aku mega deka ngambi awak tu madahka STOLport di Bario iya nya STOLport ke udah nyapai tikas pemayuh orang tambang ti niki 4.4 peratus iya nya lebuh ba taun 2017 bisi 25,100 iku enti dibanding 24,080 iku orang tambang ba taun ke dulu agi ari nya,” ku iya nambah.

Sama bisi datai ketuai pemesai eksekutif MASwings Aminuddin Zakaria.

Saritu MAHB bisi 39 buah padang bilun di Malaysia lalu lima iya nya padang bilun antarabansa, 16 buah padang bilun penerebai domestik lalu 18 buah STOLport.