KUCHING: ‘Business Event’ peluang endur bekunsi tauka betukar penemu ari orang bepenau ngagai orang landik ba pengawa dagang ba menua tu, peluang dagang sereta pengerembai serakup dunya.
Menteri Dagang Temuai, Seni, Main Asal, Nembiak enggau Lumba enggau Main Datuk Karim Abdul Rahman Hamzah madahka, peluang ‘Business Event’ nya dalam mayuh sektor baka perubat, pelajar, teknologi, sains enggau ke bukai.
Nambahka nya ‘Business Event’ tu mega meri penguntung ti jampat kelimpah agi mai empas ngagai penumbuh ekonomi menua kitai, ku iya.
“Sehari tu aku temegah ati madahka, Sarawak udah mai lebih 750 ‘Business Event’ ti sama enggau 286,000 diligit, 948, 000 hari diligit ditu, kenyau penumbuh Biro Konvensyen Sarawak (SCB) taun 2006.
“Enti dikalih ngagai nilai ekonomi lebih ari RM645 juta pulai ke Sarawak, lalu tu ke dibelanja terus ari diligit aja.
“Ba taun 2018, kitai udah matak 30 ‘Business Event’, ti ngasilka sepenyampau RM34.6 juta ti dibelanja terus sida diligit, sereta pemayuh ke datai manggai 10,000 iku deligit enggau 34,000 hari diau di Saarawak,” ku iya.
Abdul Karim mansutka pekara nya lebuh bejaku ba pengawa nyuaka Gelar Anak Sarawak Ke-9 nyerumba Business Events Tribal Meet (TriBE 2018) ti diatur SCB ba sebuah hotel ditu, kemari.
Pengerami nya kemari dipenyadi Kepala Menteri Datuk Patinggi Abang Johari Tun Openg, lalu sama digulu Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah; Menteri Muda Dagang Temuai, Seni enggau Main Asal Datuk Lee Kim Shin; Chairman Sarawak Convention Bureau Tan Sri Dato Sri Muhammad Leo Toyad, Chief Operating Officer SCB Amelia Roziman enggau ke bukai.
Bekaul enggau Gelar Anak Sarawak Ke-9, bisi tujuh gelar ti diperebutka lalu pemenang nerima geran ngelakuka makit produk enggau latih sepenyampau RM10,000 enggau RM20,000 (ungkup champion ke menggi gelar ‘Outstanding Achievement Awards’).
Ari tujuh gelar nya, pengarang berita ari The Borneo Post, Yvonne Tuah Merawin nengah artikel ‘Biz Events: What’s Next for Sarawak, Borneo Post’ menang Anak Sarawak Journalism Award - Business Events Journalism Excellence (Print/Online).
Pemenang Anak Sarawak Young Leader Scholarship Award iya nya Prescilla Susanti Sulau (Ecogreen Holidays Sdn Bhd); pemenang Anak Sarawak Business Events Award - Convention of Excellence, 55th International Congress and Convention Association Congress 2016 (CPH Travel Agencies); Pemenang Anak Sarawak Business Events Award- Corporate Events of Excellence iya nya 55th International Congress and Convention Association 2016 Elcoming Dinner (Spiral Art & Design); Paradesa Borneo menang Anak Sarawak Business Events Award - Product and Service of Excellence; sereta Imperial Hotel Miri menang Anak Sarawak Business Event Award - Meeting Venues of Excellence.
Lalu Eric van Piggelen (Borneo Convention Centre Kuching) nyadi champion lalu menggi gelar ‘Anak Sarawak Outstanding Achievent Awards’, sereta kedua iya nya Ahmad Zaiwin Mohd Kassim (Koperasi Pro Belia Inovatif Sarawak) enggau ke tiga Dr. Aidi Ahmi (Universiti Utara Malaysia). Perais tu disuaka Kepala Menteri.