KUCHING: Serakup Gerija-Gerija di Sarawak (ACS) deka ngatur pengawa ninting taun iya nya Sembiang Hari Merdeka 2018 kena 23 Ogos tu ba Christian Ecumenical Worship Centre, Jalai Stampin urung pukul 7.30 malam.
Bishop Besai Gerija Katolik Kuching, Rev. Simon Poh madah taun tu pengawa ngintu diatur gerija Katolik nitihka gintir ti udah ditetap.
“Kitai deka sembiangka pengering enggau berekat dikena ngampun, nerima enggau kasih dalam nama Jesus Kristus baka iya ngajar ke kitai. Bela disebut dalam leka sembiang iya nya nyuman enggau ngelikun kuasa ngambika sayauka menua sereta nyendiaka menua ti meruan agi ungkup semua.
“Kitai deka besembiang ngagai roh kudus ngambi ngenegapka bala ketuai kitai ngambika sida pintar agi runding ngatur pengawa menua nentuka seruran bisi penyerakup, pemaik enggau ngatika diri dalam pengelantang nitihka konstitusyen ti bisi dalam Rukun Negara.
“Nya alai, baka selama, kitai endang ngangauka bala ketuai bebida pengarap ngulu pengawa lalu besembiangka menua dikesayau kitai tu,” ku iya lebuh nguluka aum pengarang berita ba Opis ACS ditu, kemari.
Raban Koir ti ngaul gerija Kristian bemacham jalai pengarap deka ngambi bagi ti betuaika The Benediction by Heads of Churches di baruh Bishop Kuching, Sarawak enggau Brunei Darusalam, Rev. Danald Jute.
Pia mega, mensia mayuh ditesau datai ngulu sembiang tu nyengkaum bala pengari enggau ketuai nengeri sereta menua, nyengkaum sida ari Buddha, Hindu, Sikh, Bahai sereta mayuh agi.
Atur pengawa dipunka enggau Raban Pejilin deka mai tambai Sarawak enggau Malaysia maya bejalai bebala mayuh tama ke dalam balai.
Rambai jaku dipilih raban sida taun tu iya nya ‘Act Justly, Love Tednerly, Walk Humbly with God’ baka ti bisi dalam genteran jaku bup kudus Kristian Micah 6:8 enggau tagit 2,000 iku deka datai begempuru.
Berebak enggau nya, bacha genteran jaku bup kudus deka dibacha ba mayuh bansa jaku nyengkaum Jaku English, Jaku Malaysia, Kenyah, Bidayuh Biatah, Iban enggau Mandarin.
Bala kaban ACS mega tau ngatur sembiang ti sama ba gerija sida empu ba serata menua.
Sebarang tanya tau nuju Sekretari Besai ACS, Ambrose Linang ba lumur 019-8780787 tauka anjung email ngagai [email protected] tauka faks ngagai 082-419500.
Sama bisi datai Sekretari Paroki Katedral St Joseph, Ann Harrison enggau Pengatur Pengawa Katedral St Joseph, Nelly Chin.