KUCHING: Sepenyampau 12 iku pesereta renggat kepenudi deka berebutka gelar ‘Miss Tagang’ Antarabangsa Semadang 2018 ti deka diatur kena 1 September tu beserimbai enggau Festival Tagang Antarabangsa Semadang 2018.
Sida ti mujur dipilih apin lama ke udah ba sebuah hotel ditu iya nya Alicia Ester, Chris Hazel, Cornolia John, Dorathy Ann, Ellyana Murat, Fellicia Pamella, Jelianicca Lorettanisna, Natasna Sunau, Nurhafeeza Abdul Ellias, Rabcheal Emmile, Wilsey Barnabas enggau Winona Nathasa.
Festival Tagang Antarabangsa Semadang 2018 deka berengkah diatur ari 31 Ogos nyentuk 2 September tu ila di Kampung Semadang, Km 40 Jalai Puncak Borneo, Kuching.
Nitihku penyelaras pekit, Alvine Ngu Fung Ling, pekit Miss Tagang 2018 nyediaka perais mata duit RM1,300 ungkup champion seraya penuduk lumur dua enggau ketiga deka nerima RM800 enggau RM500.
Kelimpah ari nya, ku iya, tiga pemenang bela deka nerima trofi enggau perais ke bukai.
Seraya semilan iku pesereta bukai mega deka nerima perais sagu ati penyampau RM200 siku, ku iya.
Ba lansa bukai, direktor festival Robert Kenneth madahka Festival Tagang Antarabangsa Semadang ti deka diatur renggat keempat taun tu deka dirichah enggau bemacham aktiviti narit ati, dipungkal enggau pekit tanda enggau kereban muzik asal kena 31 Ogos tu, urung pukul 7.30 malam ba balai mayuh guna Kampung Semadang.
Ku iya, pekit nginti deka digulu lebih 200 pesereta, diatur muakka pagi 1 September seraya pekit pemajik gamal Miss Tagang Semadang diatu muakka malam hari, berengkah urung pukul 7.30 malam.
Pia mega ku iya, bela deka diatur kena 1 September iya nya pekit berapi ari Maggi enggau Universiti UCSI (berengkah ari pukul 10 pagi), pekit nikau laja tauka dart sereta bemacham main ke bukai.
Kena Hari Minggu deka diatur lumba ai, pekit ngelinsu ungkup nembiak mit enggau pekit karaoke ti nerima penyereta mensia mayuh.
Bela diatur sepanjai festival tiga hari berunggu iya nya pasar bejualka pemakai enggau ai irup sereta pengawa mandang.