KUCHING: Menteri Opis Kunsil enggau Pengawa Berumah Datuk Dr Sim Kui Hian netapka aplikasyen telefon pintar IPeople deka dikena ba semua opis kunsil di serata Sarawak.
Aplikasyen IPeople ku iya, udah diuji Majlis Bandaraya Kuching Selatan (MBKS) berengkah ari bulan Mei taun tu lalu deka meri awak ngagai mensia mayuh ngenataika sebana.
“Nengah aplikasyen IPeople, mensia mayuh ulih meri penemu, ngulihka penerang ke baru sereta ngemujur semua pekara ngena telefon pintar.
“Kelimpah ari nya, IPeople nyendia servis mayar chukai pintu sereta semua servis ke bekaul enggau opis kunsil,”ku Dr. Sim.
Iya mansutka jaku nya rambau ngulu pengerami ngintu genap 22 Taun Opis Kunsil Kandang Padawan(MPP) di Laman MPP ditu,kemari.
Ngenang kaul ke sama, Dr. Sim madah sistem servis ‘talian khidmat’ ke dikena ngelama tu bisi pengurang lalu enda agi engkeman dikena ba jeman teknologi baru diatu.
Ku iya, ‘talian khidmat’ enda ngemujur pinta tekalanya ke alai mensia mayuh suah nganti lama sebedau ulih bejaku enggau pemesai ke nyendia servis nya.
Bisi sekeda kes ku iya nambah, mensia mayuh semina mendingka lagu aja sebedau kangau nya putus.
Dr. Sim madah 80 peratus ari sebana nengah ‘talian khidmat’ bekaul enggau opis kunsil((PBT) lalu laluh 20 peratus sentang isu bukai.
Ketegal nya, opis menteri mutuska deka ngerembai aplikasyen telefon pintar IPeople di semua opis kunsil di serata nengeri.
‘Atur ngena Aplikasyen telefon IPeople seraris enggau juluk perintah nengeri ti dekan nempa mengeri pintar di serata Sarawak,”ku iya.
Ba pengerami kemari, Dr Sim bisi nyuaka ‘Anugerah Perkhidmatan Cemerlang’(APC) ngagai sekeda orang gawa MPP.
Bela ngulu pengerami Chairman MPP ke mega Kaban Kunsil Nengeri Batu Kitang Lo Khere Chiang enggau Sapit Chairman MPP Datuk Ahmad Ibrahim.