Anda di sini

Ukai semua semaya mujur dikeamat PH dalam100 hari

 Rintai 10 semaya ti deka dikeamatka PH dalam timpuh 100 hari.
SEMAYA PERINTAH PH: Rintai 10 semaya ti deka dikeamatka PH dalam timpuh 100 hari.

KUCHING: Parti Keadilan Rakyat (PKR) pechaya majoriti penyukung  Pakatan Harapan (PH) gaga ati enggau perintah ke diatu ti jamapt  bejalaika pansik bekaul enggau skandal 1Malaysia Development Berhad (1MDB).

Mandal Ketuai Indu PKR Menua,Voon Shiak Ni madahka penyukung PH mega sama  berasai gaga ati ati laban individu ke bekaul udah didawa lalu kapal layar ke berega RM1 bilion ti dibeli ngena duit pemayar chukai udah dibai pulai ke Malaysia.

“Siti ari batang kebuah rayat Malaysia nyukung PH  maya  pengawa  bepilih besai laban ngarapka ulih madamka sistem makai suap ti dipejalaika perintah ari baru pegai BN (Barisan Nasional) pengelama 60 taun,” ku iya lebuh dipinta mantaika penemu sekalika perintah PH udah mujur ngamatka semaya sida dalam timpuh 100 hari.

Voon ngaku, semaya 100 hari nya siti ati kebuah PH menang sereta nempa sejarah kena 9 Mei tu tadi.

“Kami nadai ngenggaika nya.Kami enggai nyadi defensif lebuh Menteri Besai Tun Dr Mahathir Mohamad enggau Menteri Wang  Lim Guan Eng ngaku PH agi begunaka timpuh (ngamatka) sekeda ari semaya 100 hari nya ketegal penanggul belanja ba duit turu menua.

“Tang kami nemu rayat udah enggau kami ngelaban pengawa makai suap ti udah ngerusak menua. Siti ari refomasi institusyenal PH ke udah teulihka pemujur iya nya mai Opis Nagang Ulah Makai Suap (SPRM) munaska ulah makai suap ke ari baruh kemata Parlimen,ukai ari  baruh Opis Menteri Besai,”ku iya.

Reformasi nya ku iya, singkang meri pulai kuasa ngagai rayat tauka pengari rayat ke udah dipilih nengah undi ti deka nemu sereta mansik ulah makai suap tauka nguji makai suap ti dikemeranka ketuai di menua tu.

Iya pechaya menua Malaysia deka sekali agi nyadi kaya enti ulah makai suap ulih dipunas lalu ekonomi menua belinsur manah.

Voon minta rayat Malaysia mereti sereta liat ati nganti sereta nejuka perintah PH ngamatka semaya pengawa bepilih dalam timpuh beberapa taun ke deka datai.

“Semua ngarapka kami ulih mulaika pemaik ekonomi di menua tu, lalu mayar utang menua ke mayuh sereta ‘nampal lubang ke besai’ ba duit turu menua ti ditinggal perintah ke sebedau tu,” ku iya.

Iya mega meri terima kasih ngagai semua pengundi ke udah meri kuasa  ngagai PH sereta ngelempaika menua tu ba PH.